យេម៉ែន៖ យន្តហោះចម្បាំងរបស់សហរដ្ឋអាមេរិកបា នបើកការវាយប្រហារតាមផ្លូវអាកាសយ៉ាងទូលំទូលាយនៅទូទាំងភាគខាងជើងប្រទេសយេម៉ែន កាលពីយប់ថ្ងៃសៅរ៍ ដោយផ្តោតលើទីតាំងជាច្រើនដែលគ្រប់គ្រងដោយក្រុមហ៊ូទី នៅក្នុងប្រតិបត្តិការទ្រង់ទ្រាយធំមួយ។ យោងតាមការប៉ាន់ប្រមាណរបស់ក្រុមហ៊ូទី កាលពីថ្ងៃអាទិត្យ ការទម្លាក់គ្រាប់បែកបានបណ្តាលឱ្យមនុស្សយ៉ាងហោចណាស់ ៣១នាក់ស្លាប់ និង ១០១ នាក់រងរបួស។
យន្តហោះចម្បាំងរបស់អាមេរិកបានធ្វើការវាយប្រហារតាមអាកាសប្រហែល ៤០ លើកសំដៅលើទីតាំងជាច្រើននៅទូទាំងខេត្តចំនួន៦ ដែលគ្រប់គ្រងដោយក្រុមហ៊ូទី នៅភាគខាងជើងប្រទេសយេម៉ែន។ យោងតាមទូរទស្សន៍ al-Masirah ដែលមានសាខារបស់ក្រុមហ៊ូទី បានឱ្យដឹងថា ការវាយប្រហារដែលបានសម្របសម្រួលបានវាយប្រហារទីតាំងនានានៅក្នុងរដ្ឋធានីសានណា ក៏ដូចជាខេត្ត Dhamar, Al-Bayda, Marib, Hajjah និង Saada របស់ប្រទេសយេម៉ែន។
នៅក្នុងទីក្រុងសានណា ការវាយប្រហារបានផ្តោតលើការដំឡើងយោធាជាយុទ្ធសាស្ត្រ រួមទាំងទីស្នាក់ការកងពលតូចមីស៊ីលនៅតំបន់ Jabal Attan តំបន់ Jarban ក្នុងសង្កាត់ Sanhan ភាគខាងកើតនៃរដ្ឋធានី និងសង្កាត់លំនៅដ្ឋាន Al-Jarraf នៅភាគខាងជើង ដែលតាមសេចក្តីរាយការណ៍បានឲ្យដឹងថា តំបន់ទាំងនោះមានការិយាល័យនយោបាយសំខាន់ៗរបស់ក្រុមហ៊ូទី។
យុទ្ធនាការទម្លាក់គ្រាប់បែកនេះបានពង្រីកដល់ហេដ្ឋារចនាសម្ព័ន្ធស៊ីវិលដ៏សំខាន់នៅក្នុងខេត្ត Saada ដែលជាទីតាំងរឹងមាំដ៏សំខាន់របស់ក្រុមហ៊ូទី នៅភាគខាងជើងឆ្ងាយរបស់ប្រទេសយេម៉ែន ជាកន្លែងដែលយន្តហោះចម្បាំងរបស់សហរដ្ឋអាមេរិកបានកំណត់គោលដៅទៅលើរោងចក្រថាមពលដ៏សំខាន់នៅក្នុងតំបន់ Dahyan ។
គោលដៅបន្ថែមរួមមានទីតាំងនៅក្នុងស្រុក Majzar សម្បូរប្រេងរបស់តំបន់ Marib ជាតំបន់នៅកណ្តាលខេត្ត Al-Bayda ទីតាំងនៅជាយខេត្ត Dhamar និងទីតាំងយោធាក្នុងខេត្ត Hajjah ។ ទីបញ្ជាការកណ្តាលរបស់សហរដ្ឋអាមេរិក បានប្រកាសជាសាធារណៈនូវប្រតិបត្តិការទ្រង់ទ្រាយធំប្រឆាំងនឹង “គោលដៅក្រុមហ៊ូទី ដែលគាំទ្រដោយអ៊ីរ៉ង់” តាមរយៈប្រព័ន្ធផ្សព្វផ្សាយសង្គម ដោយបញ្ជាក់ថា បេសកកម្មនេះមានគោលបំណង “ការពារផលប្រយោជន៍អាមេរិក រារាំងសត្រូវ និងស្ដារសេរីភាពនៃការធ្វើនាវាចរណ៍” ។
គួរបញ្ជាក់ថា នេះគឺជាប្រតិបត្តិការយោធាលើកដំបូង ដែលធ្វើឡើងដោយយោធាអាមេរិកប្រឆាំងនឹងទីតាំងក្រុមហ៊ូទី ចាប់តាំងពីប្រធានាធិបតីអាមេរិក ដូណាល់ ត្រាំ ចូលកាន់តំណែងក្នុងខែមករា ហើយបានកំណត់ក្រុមនេះឡើងវិញថា ជា “អង្គការភេរវករបរទេស”។ លោក ត្រាំ បានបង្ហោះនៅលើប្រព័ន្ធផ្សព្វផ្សាយសង្គម Truth Social ថា ការវាយប្រហារតាមអាកាសលើ “មូលដ្ឋានភេរវករ មេដឹកនាំ និងការការពារកាំជ្រួច គឺដើម្បីការពារការដឹកជញ្ជូនរបស់អាមេរិក ទ្រព្យសម្បត្តិផ្លូវអាកាស និងកងទ័ពជើងទឹក និងដើម្បីស្តារសេរីភាពនាវាចរណ៍”៕
ប្រែសម្រួល ឈូក បូរ៉ា
