សេអ៊ូល៖ កូរ៉េខាងជើងនៅថ្ងៃព្រហស្បតិ៍នេះ បានបង្ហាញនូវអ្វីដែលហាក់ដូចជាយនហ្ដហោះព្រមាន និងគ្រប់គ្រងលើអាកាស ជាលើកដំបូង ហើយបានឲ្យដឹងថា មេដឹកនាំកំពូលលោក គីម ជុងអ៊ុន បានត្រួតពិនិត្យការសាកល្បងនៃ “យន្តហោះដ្រូនវាយប្រហារអត្តឃាត” ដែលបំពាក់ដោយបច្ចេកវិទ្យាបញ្ញាសិប្បនិម្មិត (AI) ។
ទីភ្នាក់ងារសារព័ត៌មានកណ្តាលកូរ៉េ (KCNA) បានចេញផ្សាយរូបថតយន្តហោះ ខណៈពេលដែលរាយការណ៍ថា លោក គីម បានត្រួតពិនិត្យការសាកល្បងសមត្ថភាពរបស់ យន្តហោះគ្មានមនុស្សបើកជាមួយនឹងបច្ចេកវិទ្យា AI និងយន្តហោះគ្មានមនុស្សបើកឈ្លបយកការណ៍កាលពីថ្ងៃអង្គារ និងថ្ងៃពុធ នេះបើយោងតាមការចុះផ្សាយរបស់ ទីភ្នាក់ងារសារព័ត៌មានយុនហាប់។
លោក គីម ជុងអ៊ុន បានត្រួតពិនិត្យការធ្វើតេស្តនេះ ខណៈពេលដែលដឹកនាំគម្រោងស្រាវជ្រាវវិទ្យាសាស្ត្រការពារជាតិនៃ មជ្ឈមណ្ឌលបច្ចេកវិទ្យាអាកាសគ្មានមនុស្សបើក និងក្រុមស្រាវជ្រាវសង្គ្រាមអេឡិចត្រូនិក។ រូបថតបង្ហាញថា លោក គីម ណែនាំមន្ត្រីយោធានៅខាងក្នុង នូវអ្វីដែលហាក់ដូចជាយន្តហោះព្រមាន និងបញ្ជាជាមុននៅលើអាកាស ស្រដៀងទៅនឹង Peace Eye ដែលដំណើរការដោយកងទ័ពអាកាសកូរ៉េខាងត្បូង និងផលិតដោយក្រុមហ៊ុន Boeing ។
ប្រព័ន្ធព្រមានជាមុននៅលើអាកាសរកឃើញយន្តហោះ និងនាវាដោយប្រើរ៉ាដា ដើរតួជា “ភ្នែកនៅលើមេឃ” មានន័យថា កូរ៉េខាងជើង អាចមើលឃើញនូវអ្វីដែលកើតឡើងនៅលើអាកាស ។ KCNA ក៏បានបញ្ចេញរូបថតនៃការសាកល្បង យន្តហោះគ្មានមនុស្សបើកធ្វើអត្តឃាត ដោយបង្ហាញពីយន្តហោះគ្មានមនុស្សបើក ដែលដំណើរការដោយប្រព័ន្ធ AI ដោយជោគជ័យ។
KCNA បានឲ្យដឹងថា ក្នុងអំឡុងពេលត្រួតពិនិត្យ លោក គីម “បានធ្វើការវាយតម្លៃដ៏សំខាន់នៃប្រសិទ្ធភាពយោធា និងតម្លៃយុទ្ធសាស្ត្រនៃយន្តហោះគ្មានមនុស្សបើក ឈ្លបយកការណ៍ជាយុទ្ធសាស្ត្រ ជាមួយនឹងការអនុវត្តកាន់តែប្រសើរឡើង និងយន្តហោះគ្មានមនុស្សបើកវាយប្រហារអត្តឃាត ជាមួយនឹងការណែនាំនៃបញ្ញាសិប្បនិមិត្តថ្មី” ។
លោកបានសង្កត់ធ្ងន់លើឧបករណ៍គ្មានមនុស្សបើក និងវិស័យ AI គួរតែជា “អាទិភាពកំពូល” ដោយសង្កត់ធ្ងន់ថា “វាមានសារៈសំខាន់ណាស់ក្នុងការរៀបចំផែនការរយៈពេលវែងរបស់រដ្ឋឱ្យបានត្រឹមត្រូវ សម្រាប់ការលើកកម្ពស់ការអភិវឌ្ឍន៍រយៈពេលវែង យ៉ាងឆាប់រហ័សរបស់ពួកគេ ស្របតាមនិន្នាការនៃសង្គ្រាមសម័យទំនើប” ៕
