លោក Rubio បញ្ជាក់ថា លោក ដូណាល់ ត្រាំ នឹងរក្សាជម្រើស បន្ទាប់ពីការវាយប្រហារ របស់អាមេរិក លើវេណេស៊ុយអេឡា
វ៉ាស៊ីនតោន៖ រដ្ឋមន្ត្រី ការបរទេសអាមេរិក លោក Marco Rubio បានឲ្យដឹងថា ប្រធានាធិបតីអាមេរិក លោក ដូណាល់ ត្រាំ នឹងរក្សាជម្រើសទាំងអស់ អំពីរបៀប «គ្រប់គ្រង» ប្រទេសវេណេស៊ុយអេឡា ហើយនឹងមិនច្រានចោលវត្តមាន យោធាអាមេរិក នៅក្នុងប្រទេសនោះទេ នេះបើយោងតាមការចុះផ្សាយ របស់ទីភ្នាក់ងារសារព័ត៌មានចិនស៊ិនហួ ។
លោក Rubio បានឲ្យដឹងនៅលើ CBS ក្នុងបទសម្ភាសន៍មួយថា «ជាដំបូង ប្រធានាធិបតី តែងតែរក្សាជម្រើសលើអ្វីៗគ្រប់យ៉ាង និងលើបញ្ហាទាំងអស់នេះ» ដោយបន្ថែមថា ភាគីអាមេរិក នឹងវាយតម្លៃថា តើថ្នាក់ដឹកនាំបណ្តោះអាសន្ន របស់ប្រទេសវេណេស៊ុយអេឡា អាច «ធ្វើការសម្រេចចិត្តត្រឹមត្រូវ» ដែរឬទេ។
លោក ត្រាំ បានឲ្យដឹងកាលពីថ្ងៃសៅរ៍ថា សហរដ្ឋអាមេរិកនឹង «គ្រប់គ្រង» ប្រទេសអាមេរិកខាងត្បូង ដែលសម្បូរប្រេងរហូតដល់ការផ្លាស់ប្តូរ ដែលត្រូវតែបំពេញតាមការទាមទារ របស់សហរដ្ឋអាមេរិក បន្ទាប់ពីយោធាអាមេរិក បានចាប់ខ្លួនប្រធានាធិបតីវេណេស៊ុយអេឡា លោក នីកូឡាស ម៉ាឌូរ៉ូ ដែលឥឡូវនេះកំពុងជាប់ឃុំឃាំង នៅទីក្រុងញូវយ៉ក។
និយាយពីការផ្លាស់ប្តូរប្រទេសវេណេស៊ុយអេឡា លោក Rubio បានឲ្យដឹងថា សហរដ្ឋអាមេរិក នឹងវិនិច្ឆ័យប្រធានាធិបតីស្តីទីវេណេស៊ុយអេឡា លោកស្រី Delcy Rodríguez លើអ្វីដែលលោកស្រី ធ្វើនៅពេលអនាគតក្នុងនាមជាប្រធានាធិបតីស្តីទី។ នៅយប់ថ្ងៃសៅរ៍ តុលាការកំពូលនៃប្រទេសវេណេស៊ុយអេឡា បានបញ្ជាឱ្យអនុប្រធានាធិបតីរបស់លោក ម៉ាឌូរ៉ូ គឺលោកស្រី Rodríguez ទទួលយកតួនាទីជាប្រធានាធិបតីស្តីទីភ្លាមៗក្នុងករណីលោក ម៉ាឌូរ៉ូ អវត្តមាន។
លោក Rubio បានលើកឡើងថា “យើងរំពឹងថា នឹងឃើញការអនុលោមតាមច្បាប់ និងកិច្ចសហប្រតិបត្តិការច្រើនជាងអ្វីដែលយើងទទួលបានពីមុន”។ លោកបន្ដថា “យើងនឹងធ្វើការវាយតម្លៃ… ប្រសិនបើពួកគេមិនធ្វើការសម្រេចចិត្តត្រឹមត្រូវទេ សហរដ្ឋអាមេរិក នឹងរក្សាឥទ្ធិពលជាច្រើន ដើម្បីធានាថាផលប្រយោជន៍របស់យើងត្រូវបានការពារ ហើយនោះរួមបញ្ចូលទាំងការដាក់ឱ្យនៅដាច់ដោយឡែកពីប្រេងដែលមានជាធរមាន ក្នុងចំណោមរបស់ផ្សេងទៀត”។
អ្នកការទូតកំពូល របស់សហរដ្ឋអាមេរិកបានលើកឡើងថា “គោលបំណងរបស់យើងទាក់ទងនឹងរបៀប ដែលប្រទេសវេណេស៊ុយអេឡា ប៉ះពាល់ដល់ផលប្រយោជន៍ជាតិរបស់សហរដ្ឋអាមេរិកមិនបានផ្លាស់ប្តូរនោះទេ ហើយយើងចង់ ឱ្យគោលដៅទាំងនោះត្រូវបានដោះស្រាយ។ យើងចង់ឱ្យការជួញដូរគ្រឿងញៀនត្រូវបានបញ្ឈប់ យើងមិនចង់ឱ្យសមាជិកក្រុមក្មេងទំនើងមករកយើងទៀតនោះទេ”។
លោក Rubio មិនបានផ្តល់ពេលវេលា សម្រាប់ការផ្លាស់ប្តូរ របស់វេណេស៊ុយអេឡានោះទេ។ ផ្ទុយទៅវិញ លោកបានសង្កត់ធ្ងន់ថា ការរំពឹងទុក នៃការបោះឆ្នោត ដែលមានការផ្លាស់ប្តូរយ៉ាងឆាប់រហ័សនៅក្នុងប្រទេសនេះគឺ “មិនសមហេតុផល” ដោយសារតែប្រទេសវេណេស៊ុយអេឡា មាន “ប្រព័ន្ធ Chavismo នេះអស់រយៈពេល ១៥ ឬ ១៦ ឆ្នាំទៅហើយ” ។
បន្ទាប់ពីការវាយឆ្មក់របស់សហរដ្ឋអាមេរិក លោកស្រី Rodríguez កាលពីថ្ងៃសៅរ៍ បានទាមទារឱ្យសហរដ្ឋអាមេរិក ដោះលែងលោក ម៉ាឌូរ៉ូ និងភរិយារបស់លោក ដោយកត់សម្គាល់ថា បូរណភាពទឹកដីរបស់ប្រទេសវេណេស៊ុយអេឡា ត្រូវបាន «វាយប្រហារយ៉ាងសាហាវ» ខណៈដែលសហរដ្ឋអាមេរិក បានធ្វើឲ្យរង្គោះរង្គើទីក្រុងការ៉ាកាស និងតំបន់ផ្សេងទៀតនៃប្រទេស៕
ប្រែសម្រួល ឈូក បូរ៉ា
