ប្រេស៊ីល និងម៉ិកស៊ិក រួមគ្នាថ្កោលទោស ការវាយប្រហារ របស់សហរដ្ឋអាមេរិក ប្រឆាំងនឹងវេណេស៊ុយអេឡា
សៅប៉ូឡូ ៖ ប្រេស៊ីល និងម៉ិកស៊ិក បានរួមគ្នាថ្កោលទោសការវាយប្រហារថ្មីៗ របស់សហរដ្ឋអាមេរិកលើអធិបតេយ្យភាព របស់ប្រទេសវេណេស៊ុយអេឡា និងបានច្រានចោលគំនិតណាមួយ នៃការបែងចែកពិភពលោក ទៅជាវិស័យឥទ្ធិពល នេះបើយោងតាមសេចក្តីថ្លែងការណ៍ របស់ប្រធានាធិបតីប្រេស៊ីល។
ប្រធានាធិបតីប្រេស៊ីល លោក Luiz Inacio Lula da Silva និងសមភាគីម៉ិកស៊ិក លោកស្រី Claudia Sheinbaum បានធ្វើការសន្ទនាតាមទូរស័ព្ទ ដើម្បីពិភាក្សាអំពីស្ថានភាពនៅក្នុងប្រទេស វេណេស៊ុយអេឡា បន្ទាប់ពីសហរដ្ឋអាមេរិក បានបើកការវាយឆ្មក់ នៅក្នុងប្រទេសវេណេស៊ុយអេឡា កាលពីថ្ងៃសៅរ៍ ដោយចាប់ខ្លួនប្រធានាធិបតី ប្រទេសនេះ លោក នីកូឡាស ម៉ាឌូរ៉ូ និងភរិយារបស់លោក មុនពេលដាក់ពួកគេនៅក្នុងពន្ធនាគារ នៅទីក្រុងញូវយ៉ក។
សេចក្តីថ្លែងការណ៍បានឧ្យដឹងថា “ខណៈដែលបដិសេធការវាយប្រហារ លើអធិបតេយ្យភាពរបស់ប្រទេសវេណេស៊ុយអេឡា មេដឹកនាំទាំងពីរ បានបដិសេធចក្ខុវិស័យហួសសម័យណាមួយ ដែលអាចបង្កប់ន័យពីការ បែងចែកពិភពលោកទៅជាតំបន់ឥទ្ធិពល។ នៅក្នុងបរិបទនេះ មេដឹកនាំទាំងពីរបានបញ្ជាក់ជាថ្មីនូវការប្តេជ្ញាចិត្តរបស់ពួកគេចំពោះពហុភាគីនិយម ច្បាប់អន្តរជាតិ និងពាណិជ្ជកម្មសេរី”។
លោក Lula និងលោកស្រី Sheinbaum ដែលជាប្រមុខ នៃសេដ្ឋកិច្ចធំជាងគេទាំងពីរនៅអាមេរិកឡាទីន បានសម្តែងការត្រៀមខ្លួនរួចជាស្រេច ដើម្បីបន្តសហការជាមួយប្រទេស វេណេស៊ុយអេឡា ដើម្បីគាំទ្រដល់សន្តិភាព ការសន្ទនា និងស្ថិរភាពនៅក្នុងប្រទេស និងតំបន់ទូលំទូលាយ៕
