ឧស្សាហកម្មផលិតស្រោម អនាម័យ ដ៏ធំរបស់ប្រទេសឥណ្ឌា កំពុងប្រឈមមុខ នឹងការរំខានយ៉ាងធ្ងន់ធ្ងរ ដោយសារអ៊ីរ៉ង់បិទច្រកសមុទ្រ Hormuz
បរទេស៖ ឧស្សាហកម្មស្រោមអនាម័យដ៏ធំរបស់ប្រទេសឥណ្ឌា កំពុងប្រឈមមុខនឹងការរំខានយ៉ាងធ្ងន់ធ្ងរដោយសារតែកង្វះខាតសម្ភារៈ និងការកើនឡើង នៃថ្លៃដើមផលិតកម្ម ដែលទាក់ទងនឹងសង្គ្រាមដែលកំពុងបន្តនៅមជ្ឈិមបូព៌ា, នេះបើយោងតាមរបាយការណ៍ របស់ប្រព័ន្ធផ្សព្វផ្សាយក្នុងស្រុកឥណ្ឌា ដោយដកស្រង់សម្តីក្រុមហ៊ុនផលិត។
យោងតាមសារព័ត៌មាន RT ចេញផ្សាយ នៅថ្ងៃទី២ ខែមេសា ឆ្នាំ២០២៦ថា ប្រទេសឥណ្ឌាផលិតស្រោមអនាម័យជាង ៦ ពាន់លានស្រោមជារៀងរាល់ឆ្នាំ នៅក្នុងទីផ្សារដែលមានបរិមាណខ្ពស់ និងមានប្រាក់ចំណេញទាប ដែលមានតម្លៃ ៨៦០ លានដុល្លារ ។ វិស័យនេះពឹងផ្អែកយ៉ាងខ្លាំងទៅលើ ការផ្គត់ផ្គង់ប្រេងស៊ីលីកូន និងអាម៉ូញាក់ ដែលធ្វើឱ្យជ័រកៅស៊ូឆៅមានស្ថេរភាព។
ចាប់តាំងពីអ៊ីរ៉ង់បានបិទច្រកសមុទ្រ Hormuz ចំពោះកប៉ាល់ភាគច្រើន ដើម្បីឆ្លើយតបទៅនឹងការវាយប្រហារតាមអាកាសរបស់សហរដ្ឋអាមេរិក និងអ៊ីស្រាអែល ខ្សែសង្វាក់ផ្គត់ផ្គង់សម្រាប់វត្ថុធាតុដើមដែលមានមូលដ្ឋានលើប្រេងឥន្ធនៈត្រូវបានរំខាន ដែលនាំឱ្យមាន “កង្វះខាតយ៉ាងខ្លាំង” នៃប្រេងស៊ីលីកូន និងការកើនឡើងនៃតម្លៃអាម៉ូញាក់ដែលបានព្យាករណ៍ថានឹងកើនឡើង 40-50% នេះបើយោងតាមមន្ត្រីឧស្សាហកម្មដែលបានដកស្រង់សម្តីដោយ Indian Express។
ឱសថស្ថាននៅក្នុងទីក្រុងធំៗដូចជា Mumbai និង New Delhi ត្រូវបានគេរាយការណ៍ថាកំពុងប្រឈមមុខនឹងកង្វះខាតស្តុករួចហើយ។
ប្រទេសឥណ្ឌាបានផលិតស្រោមអនាម័យចំនួន ៦,៤ពាន់លានស្រោមក្នុងឆ្នាំ ២០២៤ ដែលមានចំនួនជិត ១៧% នៃទិន្នផលសកល នេះបើយោងតាមទិន្នន័យ IndexBox។
ប្រែសម្រួលៈ ណៃ តុលា
