វិទ្យាស្ថាន RPITSK នៅខេត្តកំពត ផ្តល់អាហារូបករណ៍ជិត ១ពាន់កន្លែងលើជំនាញចំនួន១១ ដល់យុវជនដែលមកពីគ្រួសារក្រីក្រ និងងាយរងហានិភ័យ
កំពត៖ វិទ្យាស្ថានពហុបច្ចេកទេភូមិភាគតេជោខេត្តកំពត (RPITSK) នៃក្រសួងការងារ និងបណ្ដុះបណ្ដាលវិជ្ជាជីវៈ បានផ្ដល់ឱកាសអាហារូបករណ៍សរុប ៦៦០កន្លែងលើមុខជំនាញចំនួន១១ ជាមួយនិងប្រាក់ឧបត្ថម្ភបន្ថែមជារៀងរាល់ខែពីរាជរដ្ឋាភិបាលសម្រាប់យុវជនដែលមកពីគ្រួសារក្រីក្រ និងងាយរងហានិភ័យ។
បើតាមវិទ្យាស្ថាន RPITSK បានឱ្យដឹងថា វិទ្យាស្ថានបានផ្ដល់ឱកាសអាហារូបករណ៍ជំនាញលើមុខជំនាញ ១១ នោះរួមមាន ការងារកំបោរ, ការដំឡើងបណ្តាញអគ្គិសនីក្នុងអាគារ, ការផ្សារលោហៈដោយធ្នូអគ្គិសនី(ធូប), សេវាកម្មបរិក្ខារត្រជាក់ក្នុងគេហដ្ឋាន, ការថែទាំ និងជួសជុលរថយន្ត, ការថែទាំ និងជួសជុលអគ្គិសនីរថយន្ត, ការថែទាំ និងជួសជុលម៉ាស៊ីនត្រជាក់រថយន្ត, សេវាកម្មកុំព្យូទ័រ, សេវាកម្មម្ហូបអាហារ និងភេសជ្ជៈ, ធុរៈកិច្ចភេសជ្ជៈ, ការកែច្នៃបន្លែ និងផ្លែឈើ។
ជាមួយគ្នានេះវិទ្យាស្ថានបានបញ្ជាក់ថា គិតចាប់ពីខែវិច្ឆិកា ឆ្នាំ២០២៣ មកត្រឹមខែកក្កដា ឆ្នាំ២០២៦ នេះមានយុវជនមកពីគ្រួសារក្រីក្រ និងពលរដ្ឋទូទៅសរុប ១,២២៤នាក់ ដែលទទួលបានអាហារូបករណ៍លើ ១១មុខជំនាញ ក្នុងកម្មវិធីបណ្តុះបណ្តាលជំនាញ ១,៥លាននាក់របស់សម្ដេចធិបតី ក្នុងនោះមានយុវជនដែលមកពីគ្រួសារក្រីក្រ និងងាយរងហានិភ័យចំនួន ៣៤៤នាក់។
បន្ថែមពីលើនេះវិទ្យាសា្ថនគ្រោងនឹងបើកវគ្គសិក្សាថ្មី នឹងចាប់ផ្តើមចុះឈ្មោះចូលរៀនចាប់ពីថ្ងៃជូនដំណឹងនេះតទៅ ដើម្បីទទួលបានអាហារូបករណ៍សិក្ខាកាមអាចទាក់ទងសាកសួរព័ត៌មានបន្ថែមតាមរយៈទូរសព្ទលេខ ០១០ ៣៧៤ ៤៣៦/ ០១២ ៩៩០ ៨៩៨ ឬអញ្ជើញមកទីតាំងរបស់វិទ្យាស្ថានពហុបច្ចេកទេភូមិភាគតេជោខេត្តកំពត (RPITSK) ១ឧសភា សង្កាត់កំពង់កណ្តាល ក្រុងកំពត ខេត្តកំពត ៕
