ភ្នំពេញ៖ ក្រសួងសុខាភិបាលកម្ពុជា កាលពីថ្ងៃទី២៦ ខែមីនា ឆ្នាំ២០២០ បានប្រកាសរកឃើញបុគ្គលចំនួន ៣៤០នាក់ ជាអ្នកប៉ះពាល់ប្រយោល ជាមួយអ្នកទេសចរ ជនជាតិបារាំង ដែលមាន វិជ្ជមានវីរុសកូវីដ១៩ កាលពីពេលថ្មីៗនេះ នៅខេត្តព្រះសីហនុ ខណៈពួកគេត្រូវបានដាក់ដោយឡែក១៤ថ្ងៃ ដើម្បីតាមដានសុខភាព។
យោងតាម សេចក្តីជូនព័ត៌មាន ស្តីពីការរកឃើញ ២ករណីថ្មី ជាបុរសជនជាតិឥណ្ឌូណេស៊ី វិជ្ជមានវីរុសកូវីដ១៩ និងមានអ្នកជាសះស្បើយម្នាក់ របស់ក្រសួងសុខាភិបាល បានឲ្យដឹងថា “ក្រុមការងារ របស់មន្ទីរសុខាភិបាលខេត្តសៀមរាប បានរកឃើញបុគ្គល ចំនួន ៣៤០នាក់ ដែលជាអ្នកប៉ះពាល់ប្រយោល ជាមួយអ្នកទេសចរ ជនជាតិបារាំង នៅខេត្តព្រះសីហនុ ។ បច្ចុប្បន្ន ពួកគាត់ស្ថិតនៅក្រោមការតាមដាន សុខភាពរបស់មន្ទីរសុខាភិបាល ខេត្តសៀមរាប ក្នុងរយៈពេល១៤ថ្ងៃ” ។
គួរបញ្ជាក់ថា គិតត្រឹមម៉ោង ២០៖០០នាទីថ្ងៃទី២៦ ខែមីនា ឆ្នាំ២០២០ ករណីវិជ្ជមានវីរុសកូវីដ១៩ សរុបទាំងអស់មានចំនួន ៩៨នាក់ (ស្រី២៥នាក់ ប្រុស៧៣នាក់) ក្នុងនោះមានចំនួន ១១នាក់ ដែលបានជាសះស្បើយ (ដោយមិនរាប់បញ្ចូល ជនជាតិស៊ុយអែត ១នាក់ ដែលបានចាកចេញ ពីកម្ពុជា ដោយគាត់មិននៅរង់ចាំ ទទួលលទ្ធផលតេស្ត)៕ ដោយ៖ ដារាត់
