ថៃរកឃើញ អ្នកឆ្លងជំងឺកូវីដ១៩ ចំនួន ៤៥នាក់ទៀត សរុប ២.៥១៨នាក់ និងអ្នកស្លាប់ កើនដល់ ៣៥នាក់

បរទេស៖ ប្រទេសថៃ មានអ្នកជំងឺកូវីដ១៩ ចំនួន២ នាក់ទៀតបានស្លាប់ ដែលនាំឱ្យមានអ្នកស្លាប់ សរុបកើនដល់ ៣៥នាក់ និងបានរកឃើញ ករណីឆ្លងជំងឺថ្មីចំនួន ៤៥នាក់ទៀត សរុបអ្នកឆ្លងជំងឺមានចំនួន ២.៥១៨ នាក់។

យោងតាមសារព័ត៌មាន Bangkok Post ចេញផ្សាយនៅថ្ងៃទី១១ ខែមេសា ឆ្នាំ២០២០ បានឱ្យដឹងថា លោក Taweesin Visanuyothin អ្នកនាំពាក្យមជ្ឈមណ្ឌល គ្រប់គ្រងស្ថានភាពជំងឺ Covid-19 (CCSA) បាននិយាយនៅថ្ងៃសៅរ៍ថា អ្នកជំងឺ ២ នាក់ទៀតបានស្លាប់ និងការឆ្លងថ្មីចំនួន ៤៥ នាក់ក្នុងនោះមាន ៩ នាក់ ជាអ្នកត្រូវបានដាក់ ឱ្យនៅដាច់ដោយឡែក និងបានរកឃើញកាលពីថ្ងៃសុក្រ ដែលការរកឃើញថ្មីនេះ បាននាំករណីឆ្លងកើនឡើង នៅក្នុងខេត្តចំនួន ៦៨ ដល់ ២.៥១៨ នាក់។

អ្នកស្លាប់ម្នាក់គឺជនជាតិថៃ ដែលមានរាងកាយធាត់ អាយុ ៣៦ ឆ្នាំ ដែលធ្វើការនៅហាងបញ្ចាំ និងរស់នៅជាមួយ ម្តាយនិងប្អូនស្រីរបស់គាត់។ គាត់បានធ្លាក់ខ្លួនឈឺ ដោយមានគ្រុនក្តៅខ្លាំង និងក្អក។ គាត់បានស្វែងរកការព្យាបាល នៅមន្ទីរពេទ្យឯកជនមួយ ហើយត្រូវបាន គេធ្វើរោគវិនិច្ឆ័យថា មាន Covid-19 នៅថ្ងៃទី ២ ខែមេសា។

អ្នកស្លាប់ទី ២ គឺបុរសជនជាតិថៃអាយុ ៦៥ ឆ្នាំ ដែលធ្វើការជាអ្នកបោសសំអាត នៅទីក្រុងបាងកក។ គាត់បានធ្វើដំណើរទៅខេត្ត Phayao កាលពីថ្ងៃទី១៦មីនា ។ ៨ថ្ងៃក្រោយមក គាត់ក្តៅខ្លួនខ្លាំងនិងក្អក។ គាត់បានស្វែងរកការព្យាបាល នៅមន្ទីរពេទ្យមួយនៅខេត្តភាគខាងជើងនេះ ហើយបានធ្វើតេស្តវិជ្ជមាន៕ ប្រែសម្រួលៈ ណៃ តុលា