កងទ័ពជើងទឹក អាមេរិក ដឹកនាំ“ សេរីភាពនាវាចរណ៍” នៅសមុទ្រចិន ខាងត្បូង ចំណែកទីក្រុងប៉េកាំង ជំរុញឲ្យមហាអំណាច មួយនេះបញ្ឈប់ការ បង្កហេតុ

បរទេស៖ រដ្ឋមន្រ្តីក្រសួងការពារជាតិ អាមេរិកលោក Mark Esper មុននេះ បានរិះគន់គោលនយោបាយរបស់រដ្ឋាភិបាល ទីក្រុងប៉េកាំងនៅសមុទ្រចិនខាងត្បូងដោយចោទប្រកាន់ប្រទេស នេះថា បានធ្វើឱ្យអន្តរាយដល់ស្ថិរភាព ក្នុងតំបន់ និងបន្ថែមថា សហរដ្ឋអាមេរិកនឹងរក្សាវត្តមាន យោធាជាប្រចាំនៅក្នុងតំបន់ នេះដើម្បីបង្ហាញពីភាពធ្ងន់ធ្ងរនៃការប្តេជ្ញាចិត្ត ទាំងនេះ។

យោងតាមសារព័ត៌មាន Sputnik ចេញផ្សាយនៅថ្ងៃទី២២ ខែវិច្ឆិកា ឆ្នាំ២០១៩ បានឱ្យដឹងថា អ្នកនាំពាក្យកងទ័ពជើងទឹក Seventh Fleet របស់សហរដ្ឋអាមេរិកលោកមេបញ្ជាការ Reann Mommsen ដែលត្រូវបានដកស្រង់ដោយ ទីភ្នាក់ងារសារព័ត៌មានរ៉យទ័រថា នាវាចម្បាំងរបស់កងទ័ពជើងទឹកអាមេរិក បានធ្វើដំណើរនៅជិតដែនដីមានជម្លោះនៅសមុទ្រចិនខាងត្បូងកាល ពីថ្ងៃពុធ និងថ្ងៃព្រហស្បតិ៍ ហើយប្រតិបត្តិការ“ សេរីភាពនាវាចរណ៍” នាពេលបច្ចុប្បន្នពាក់ព័ន្ធនឹងប្រជុំកោះ Paracel និងថ្មប៉ប្រះទឹក Mischief។

ចំណែកយោធាចិនវិញបាននិយាយថា ខ្លួនបានតាមដានការឆ្លងកាត់ របស់កងនាវាចរអាមេរិកនៅជិតកោះ និងបានជំរុញឱ្យទីក្រុង វ៉ាស៊ីនតោនបញ្ឈប់នូវអ្វីដែលខ្លួនហៅថាជាការបង្កហេតុ។

សូមជម្រាបថា ផ្លូវសមុទ្រនៅសមុទ្រចិន ខាងត្បូង គឺជាចំណុចជាប់គាំងមួយ នៅក្នុងទំនាក់ទំនងរវាង ទីក្រុងវ៉ាស៊ីនតោន និងទីក្រុងប៉េកាំង ក៏ដូចជា បង្កជាកំហឹងដល់ប្រជាជាតិជាច្រើនទៀត នៅក្នុងតំបន់ រួមមានវៀតណាម ប្រ៊ុយណេ ឥណ្ឌូនេស៊ី ម៉ាឡេស៊ី ហ្វីលីពីន និងកោះតៃវ៉ាន់៕