បរទេស៖ រដ្ឋមន្រ្តីក្រសួងមហាផ្ទៃ នៃរដ្ឋាភិបាលបណ្តោះអាសន្ន បូលូវី គឺលោក Arturo Murillo បានប្រកាសថា រដ្ឋាភិបាលបណ្តោះអាសន្ន របស់បូលីវី បានបើករឿងក្តី ឧក្រិដ្ឋកម្មប្រឆាំង នឹងអតីតប្រធានាធិបតី លោក Evo Morales កាលពីថ្ងៃសុក្រ។
យោងតាមសារព័ត៌មាន Sputnik ចេញផ្សាយនៅថ្ងៃទី២៣ ខែវិច្ឆិកា ឆ្នាំ២០១៩ បានឱ្យដឹងថា កាលពីថ្ងៃពុធលោក Murillo បានបង្ហាញអ្នកសារព័ត៌មាន នូវខ្សែវីដេអូឃ្លីបរបស់លោក Morales ដែលត្រូវបានគេចោទប្រកាន់ថា បានផ្តល់ការណែនាំដើម្បី ចាប់ផ្តើមការតវ៉ាថ្មីៗប្រឆាំងនឹងរដ្ឋាភិបាលបណ្តោះអាសន្ន។
លោក Murillo បន្តអះអាងថា ភាពវឹកវរដែលបានស្នើឡើងនេះអាចនាំឱ្យមានការបិទផ្លូវ ហើយដូច្នេះបណ្តាលឱ្យ មានការរំខានដល់ការដឹក ជញ្ជូនស្បៀងអាហារ ទៅកាន់ទីក្រុងបូលីវី។
លោកបន្ថែមថា «ភស្តុតាងគឺជាក់ស្តែង យើងបានបង្ហាញវា។ Juan Ramon Quintana [អតីតប្រមុខរដ្ឋបាលប្រធានាធិបតី] បានបញ្ជាក់ថា គាត់មានបំណងបង្វែរបូលីវី ឱ្យទៅជាប្រទេសវៀតណាម ហើយគាត់កំពុងព្យាយាមធ្វើវា … វីដេអូបង្ហាញភស្តុតាងប្រឆាំងនឹងលោក Evo Morales ។ អ្នកអាចស្តាប់ យ៉ាងច្បាស់ពីការថតសំឡេង ដែលគាត់អំពាវនាវ ឱ្យមានការសម្លាប់ជនស៊ីវិល និងការឡោមព័ទ្ធទីក្រុង។
នៅមុននេះបន្តិច ក្រសួងការបរទេស បូលីវី បានធ្វើការតវ៉ាទៅរដ្ឋាភិបាល ម៉ិកស៊ិក ដោយនិយាយថា លោក Morales បានចូលរួមក្នុងសកម្មភាព ដែលផ្ទុយពីស្ថានភាពសិទ្ធិ ជ្រកកោន ដែលគាត់បានទទួល នៅប្រទេសម៉ិកស៊ិក បន្ទាប់ពីគាត់បានភៀសខ្លួន នៅទីនោះបន្ទាប់ ពីការលាលែងរបស់គាត់៕
ប្រែសម្រួលៈ ណៃ តុលា
