តូក្យូ: ទីភ្នាក់ងារចិនស៊ិនហួចេញផ្សាយ នៅថ្ងៃអាទិត្យទី២២ ខែធ្នូ នេះបានឲ្យដឹងថា
នាយករដ្ឋមន្រ្តីជប៉ុន លោក ស៊ីនហ្សូ អាបេ បានជួបសន្ទនាគ្នាតាមទូរស័ព្ទ ជាមួយប្រធានាធិបតី សហរដ្ឋអាមេរិក ដូណាល់ ត្រាំ កាលពីយប់ថ្ងៃសៅរ៍ម្សិលមិញ ក្នុងគោលបំណង ដើម្បីសង្ខេបលទ្ធផល នៃកិច្ចពិភាក្សា រវាងនាយករដ្ឋមន្រ្តីជប៉ុន ជាមួយប្រធានាធិបតីអ៊ីរ៉ង់ ហាសាន់ រូហានី ចុងក្រោយនេះ។
ក្នុងអំឡុងពេល នៃការសន្ទនា ដែលត្រូវបានគេជឿជាក់ថា មានរយៈពេលប្រហែល៧៥នាទី លោកអាបេ បានប្រាប់លោកត្រាំ យ៉ាងនេះថា ប្រទេសជប៉ុន នឹងបន្តកិច្ចប្រឹងប្រែងការទូត ដើម្បីបន្ធូរបន្ថយភាពតានតឹង នៅមជ្ឈឹមបូព៌ា ដោយធ្វើការយ៉ាងជិតស្និទ្ធ ជាមួយសហរដ្ឋអាមេរិក លើបញ្ហាជាមួយនឹង ប្រទេសអ៊ីរ៉ង់។
គួរឲ្យដឹងដែរថាការសន្ទនា តាមទូរស័ព្ទ ដែលលោកអាបេ បាននិយាយត្រូវបានធ្វើការស្នើសុំឡើង តាមសំណើរបស់លោកត្រាំ បានកើតឡើងមួយថ្ងៃ បន្ទាប់ពីលោកអាបេ បានជួបពិភាក្សា ជាមួយរ៉ូហានី នៅទីក្រុងតូក្យូ៕
ប្រែសម្រួល:ស៊ុនលី
