ព័ត៌មានអន្តរជាតិ

កោះតៃវ៉ាន់ពិន័យ អ្នកជំងឺកូរ៉ូណាវីរុស១ម៉ឺនដុល្លារ ដោយសារលាក់បាំងជំងឺរបស់ខ្លួន

តៃប៉ិ៖ អាជ្ញាធរសុខាភិបាលរបស់កោះតៃវ៉ាន់ បាននិយាយកាលពីថ្ងៃសៅរ៍ថា បុរសម្នាក់ដែលឆ្លងវីរុសកូរ៉ូណា នឹងត្រូវពិន័យ ៣០០,០០០ ដុល្លារតៃវ៉ាន់ថ្មី (១០,០០០ ដុល្លារ) ពីបទលាក់បាំងជំងឺរបស់ខ្លួន បន្ទាប់ពីធ្វើដំណើរទៅកាន់ទីក្រុងវូហាន ដែលជាចំណុចកណ្តាល នៃការផ្ទុះជំងឺរលាកសួតថ្មីនៅចិន។

យោងតាមសារព័ត៌មាន Asia Review ចេញផ្សាយកាលពីថ្ងៃទី២៦ ខែមករា ឆ្នាំ២០២០ បានឱ្យដឹងថា បុរសនេះគឺជាមនុស្សម្នាក់ ក្នុងចំណោមមនុស្ស ៣ នាក់ គិតត្រឹមថ្ងៃសៅរ៍នៅកោះតៃវ៉ាន់ ដែលត្រូវបានគេធ្វើរោគវិនិច្ឆ័យថា មានជំងឺឆ្លង ដែលអាចបណ្តាលឱ្យមានជំងឺរលាកសួត។

យោងតាមទីភ្នាក់ងារសារព័ត៌មានកណ្តាល របស់កោះតៃវ៉ាន់បានអោយដឹងថា គាត់បានធ្វើតេស្តិ៍រកវីរុសនេះ វិជ្ជមាននៅថ្ងៃពុធ នៅឯមន្ទីរពេទ្យមួយ នៅភាគខាងត្បូងទីក្រុង Kaohsiung ។

ការពិន័យនេះបង្ហាញថា រដ្ឋាភិបាលប្រធានាធិបតី Tsai Ing-wen មានឆន្ទៈអនុវត្តច្បាប់ដាច់ដោយឡែក ប្រឆាំងនឹងការរីករាលដាលនៃមេរោគ ដែលបានឆ្លងដល់មនុស្សជាង ១.៣០០ នាក់ និងបានសម្លាប់មនុស្ស ៨០ នាក់នៅក្នុងប្រទេសចិនដីគោក។
ថ្ងៃឈប់សម្រាកបុណ្យចូលឆ្នាំថ្មី ដែលកំពុងបន្តគឺជាពេលវេលាគ្រោះថ្នាក់ ជាពិសេសសម្រាប់ការឆ្លងមេរោគ ពីព្រោះប្រជាជនតៃវ៉ាន់ជាច្រើន បានជួលធ្វើការនៅដីគោក ត្រឡប់មកផ្ទះវិញ ដើម្បីចំណាយពេលជាមួយគ្រួសារ៕

បំរាម៖ ហាមយកព័ត៌មានរបស់សារព័ត៌មាន ដើមអម្ពិល ចុះផ្សាយដោយគ្មានការជូនដំណឹងមកជាមុន។ រាល់បញ្ហាអត្ថបទដែលយកចុះផ្សាយបន្ត ស្ថាប័នយើងខ្ញុំមិនទទួលខុសត្រូវឡើយ។ លោកអ្នកអាចទំនាក់ំទំនងមកក្រុមការងារតាមរយៈ​ទូរស័ព្ទលេខ៖ 012 722337 ឬ dapnews@gmail.com

All rights reserved by: DAP News

To Top