ព័ត៌មានអន្តរជាតិ

ភ្លៀងធ្លាក់ចុះយ៉ាងគំហុក ក្នុងរយៈពេល៣ថ្ងៃ បណ្តាលឲ្យស្លាប់ពលរដ្ឋ ប៉ាគីស្ថាន អស់តិចបំផុត ១៦នាក់

ឥស្លាម៉ាបាដ៖ ទីភ្នាក់ងារព័ត៌មានចិនស៊ិនហួ បានចុះផ្សាយនៅថ្ងៃទី២៩ ខែសីហា ឆ្នាំ២០២០ថា អាជ្ញាធរគ្រប់គ្រងគ្រោះ មហន្តរាយខេត្ត Khyber Pakhtunkhwa បានឲ្យដឹងកាលពីថ្ងៃសុក្រថា ភ្លៀងនារដូវវស្សាបានបង្អុរធ្លាក់ចុះយ៉ាងខ្លាំងក្នុងរង្វង់៣ថ្ងៃ នៅតំបន់ខ្លះនៃខេត្ត Khyber Pakhtunkhwa ស្ថិតនៅភាគពាយព្យ នៃប្រទេសប៉ាគីស្ថាន បានសម្លាប់មនុស្ស អស់តិចបំផុត១៦នាក់ ទន្ទឹមនឹងនោះដែរ បានបង្កឲ្យរបួសជាច្រើននាក់ទៀត ។

អាជ្ញាធរខាងលើបានឲ្យដឹងថា ផ្ទះលើសពី២៩ខ្នងត្រូវបាន បំផ្លាញទាំងស្រុង និង២៥ខ្នងផ្សេងទៀតរងការបំផ្លាញ ដោយផ្នែកខ្លះ ក្នុងពេលមានភ្លៀងធ្លាក់យ៉ាងខ្លាំងនៅក្នុងខេត្តនេះ ។ ក្រុមអាជ្ញាធរបានបន្ថែមថា ប្រតិបត្តិការជួយសង្គ្រោះ បានចាប់ផ្តើមឡើង ដើម្បីជួយដល់អ្នកដែលបានរងនូវ ផលប៉ះពាល់ក្នុងតំបន់ជាច្រើន នៃខេត្តនេះ ។

ក្រៅពីនេះក៏មានករណី គ្រោះបាក់ដីបានកើតឡើងដែរ ដែលបានបង្កការរាំងស្ទះដល់ការធ្វើដំណើរ នៅតាមដងផ្លូវ Bisham-Swat និងតំបន់ផ្សេងៗទៀតដែលមានច្រើនកន្លែង បង្កការកកស្ទះចរាចរណ៍ ។ អាជ្ញាធរដដែលនេះបានឲ្យដឹងថា ការងារបោសសម្អាតត្រូវបានបង្កការរាំងស្ទះ ដល់ផ្លូវដែលធ្វើដំណើរ ៕
ប្រែសម្រួលដោយ៖ ម៉ៅ បុប្ផាមករា

បំរាម៖ ហាមយកព័ត៌មានរបស់សារព័ត៌មាន ដើមអម្ពិល ចុះផ្សាយដោយគ្មានការជូនដំណឹងមកជាមុន។ រាល់បញ្ហាអត្ថបទដែលយកចុះផ្សាយបន្ត ស្ថាប័នយើងខ្ញុំមិនទទួលខុសត្រូវឡើយ។ លោកអ្នកអាចទំនាក់ំទំនងមកក្រុមការងារតាមរយៈ​ទូរស័ព្ទលេខ៖ 012 722337 ឬ dapnews@gmail.com

All rights reserved by: DAP News

To Top