ប៉េកាំង៖ ប្រទេសចិនបានរិះគន់ប្រទេសចំនួន ១៤ រួមមានប្រទេសជប៉ុន និងសហរដ្ឋអាមេរិក ចំពោះការធ្វើនយោបាយលើ បញ្ហាប្រភពដើមនៃវីរុសកូវីដ-១៩ បន្ទាប់ពីពួកគេបានសម្តែងការ ព្រួយបារម្ភលើការស៊ើបអង្កេតរួមគ្នាមួយ ដែលធ្វើឡើងដោយ អង្គការសុខភាពពិភពលោក និងទីក្រុងប៉េកាំងនៅក្នុង ទីក្រុងរបស់ប្រទេសចិន។
អ្នកជំនាញវីរុសចិន បានអះអាងថាការស៊ើបអង្កេត ស្រដៀងគ្នានេះគួរតែត្រូវបាន អនុវត្តនៅក្នុងប្រទេសផ្សេងទៀត ដើម្បីកំណត់ប្រភពនៃវីរុស ដែលបង្កឱ្យមានជំងឺកូវីដ-១៩ ដោយអះអាងថា គំនិតដែលថាការស៊ើបអង្កេត គួរតែត្រូវបានធ្វើឡើងតែនៅក្នុងប្រទេសចិន គឺ “ខុសបច្ចេកទេស” ។
អ្នកនាំពាក្យក្រសួងការបរទេសចិនលោកស្រី ហួឈុនយីង បានប្រាប់អ្នកយកព័ត៌មានថា“ នយោបាយភាវូបនីយកម្មនៃការតាមដានវីរុស គឺគ្មានសីលធម៌ និងមិនមានប្រជាប្រិយភាព” ។ វាអាចរារាំងដល់កិច្ចសហប្រតិបត្តការ តាមដានទូទាំងពិភពលោក និងធ្វើឱ្យអន្តរាយដល់កិច្ចសហប្រតិបត្តិការ ប្រឆាំងនឹងការរីករាលដាល នៃជំងឺរបស់ពិភពលោក។
នៅក្នុងនោះដែរលោកស្រីហួ បានលើកឡើងថា “ការងារតាមដានគួរតែផ្អែកលើ ទស្សនវិស័យសកល ហើយចាំបាច់ត្រូវអនុវត្ត នៅក្នុងប្រទេសជាច្រើន” ។
ការអត្ថាធិប្បាយរបស់ចិន បានធ្វើឡើងបន្ទាប់ពីប្រទេសចំនួន ១៤ នៅក្នុងសេចក្តីថ្លែងការណ៍រួមមួយ បានសម្តែងនូវការព្រួយបារម្ភរួមគ្នាលើការសិក្សា ដែលបានធ្វើឡើងនៅទីក្រុង Wuhan ភាគកណ្តាលប្រទេសចិន កាលពីខែកុម្ភៈ ដោយចង្អុលបង្ហាញថា វាត្រូវបានពន្យារពេលយ៉ាងខ្លាំង និងខ្វះលទ្ធភាពទទួលបានទិន្នន័យ និងគំរូដើម។ ដោយវីរុសនេះ ត្រូវបានគេរកឃើញដំបូង នៅទីក្រុងវូហាន នៅចុងឆ្នាំ២០១៩ ។
ការសិក្សារួមគ្នារបស់ អង្គការសុខភាពពិភពលោកនិងចិន ស្តីពីប្រភពដើមនៃវីរុស បានសន្និដ្ឋានថា វីរុសនេះមិនអាចលេចធ្លាយចេញពី មន្ទីរពិសោធន៍មួយនៅទីក្រុងវូហាន បាននោះទេ នេះបើយោងតាមរបាយការណ៍ ដែលចេញផ្សាយដោយទីភ្នាក់ងារ សុខាភិបាលអង្គការសហប្រជាជាតិ កាលពីថ្ងៃអង្គារ។
ប្រទេសចិន បានសាទរចំពោះរបាយការណ៍ ដែលបានបដិសេធទ្រឹស្តីមួយ ដែលជឿនលឿនដោយ លោកប្រធានាធិបតីអាមេរិក ដូណាល់ ត្រាំ ថាមន្ទីរពិសោធន៍ចិន ប្រហែលជាកន្លែងកំណើត របស់វីរុសកូវីដ-១៩ ៕
ដោយ ឈូក បូរ៉ា
