តេអេរ៉ង់៖ ទីភ្នាក់ងារសារព័ត៌មាន Mizan នៃតុលាការអ៊ីរ៉ង់ បានរាយការណ៍កាលពីថ្ងៃសៅរ៍ថា តុលាការអ៊ីរ៉ង់បានសម្រេចថា រដ្ឋាភិបាលសហរដ្ឋអាមេរិក ត្រូវបង់ប្រាក់សំណងចំនួន ៣៣០ លានដុល្លារ សម្រាប់ការខូចខាតដែលបណ្តាលមកពីការធ្វើរដ្ឋប្រហារបរាជ័យដោយសហរដ្ឋអាមេរិក ប្រឆាំងនឹងអ៊ីរ៉ង់ ក្នុងឆ្នាំ១៩៨០ ។
សេចក្តីសម្រេចនេះត្រូវបានចេញដោយសាខាទី៥៥ នៃតុលាការយុត្តិធម៌ទីក្រុងតេអេរ៉ង់ បន្ទាប់ពីបានបើកសវនាការក្នុងសម័យប្រជុំមួយកាលពីថ្ងៃទី២៤ ខែកក្កដា ពាក្យបណ្តឹងបានប្តឹងរដ្ឋាភិបាលសហរដ្ឋអាមេរិក និងចុងចោទចំនួន ៧ នាក់ផ្សេងទៀតដោយក្រុមគ្រួសារនៃជនរងគ្រោះបីនាក់ និងអ្នកដែលរងរបួសអំឡុងពេលរដ្ឋប្រហារ។
យោងតាមសេចក្តីសម្រេច រដ្ឋាភិបាលសហរដ្ឋអាមេរិកត្រូវបានកាត់ទោសឱ្យសងសំណងជំងឺចិត្តចំនួន ៣០ លានដុល្លារដល់ដើមចោទ និងប្រាក់សំណងបន្ថែម ៣០០ លានដុល្លារបន្ថែមទៀតជាទោសទណ្ឌ។
ផែនការធ្វើរដ្ឋប្រហារមានគោលបំណងផ្តួលរំលំសាធារណរដ្ឋឥស្លាម ដែលទើបបង្កើតថ្មីរបស់អ៊ីរ៉ង់ និងស្ថាបនិករបស់ខ្លួនលោក Imam Khomeini ប៉ុន្មានខែបន្ទាប់ពីរបប Shah គាំទ្រដោយសហរដ្ឋអាមេរិករបស់លោក Mohammad Reza Pahlavi ត្រូវបានផ្ដួលរំលំក្នុងបដិវត្តន៍នៅឆ្នាំ១៩៧៩ ។
ផែនការនេះពាក់ព័ន្ធនឹងមន្ត្រីយោធា និងទាហានអ៊ីរ៉ង់មួយចំនួនធំ ហើយត្រូវបានរារាំងតាមរយៈការចាប់ខ្លួនពួកគេរាប់រយនាក់នៅថ្ងៃទី០៩ និងទី១០ ខែកក្កដា ឆ្នាំ១៩៨០ នៅជិតខេត្ត Hamedan ភាគខាងលិចប្រទេស។
មជ្ឈមណ្ឌលឯកសារបដិវត្តន៍អ៊ីស្លាមរបស់អ៊ីរ៉ង់បានបង្ហាញក្នុងឆ្នាំ២០១៧ ថា សហរដ្ឋអាមេរិកបានដើរតួនាទីយ៉ាងសំខាន់ក្នុងការរៀបចំផែនការ និងធ្វើរដ្ឋប្រហារ ដោយផ្តល់ “ជំនួយហិរញ្ញវត្ថុ” សម្រាប់អ្នករៀបចំផែនការធ្វើរដ្ឋប្រហារ និងមធ្យោបាយផ្សេងទៀត៕ ប្រែសម្រួល ឈូក បូរ៉ា
