ម៉ូស្គូ៖ សាកសពលោក Yevgeny Prigozhin ប្រធានក្រុមយោធា Wagner ដែលបានជួបគ្រោះថ្នាក់ធ្លាក់យន្ដហោះកាលពីពេលថ្មីៗនេះ ត្រូវបានគេបញ្ចុះជាលក្ខណៈឯកជនកាលពីថ្ងៃអង្គារ នៅក្នុងទីក្រុងកំណើតរបស់លោក St. Petersburg ប្រទេសរុស្ស៊ី។
សេវាសារព័ត៌មានរបស់លោក Prigozhin បានឲ្យដឹងនៅក្នុងការបង្ហោះនៅលើបណ្ដាញ Telegram ថា ពិធីបញ្ចុះសពធ្វើឡើងក្នុងទម្រង់បិទជិត ហើយអ្នកដែលមានបំណងចង់គោរពលោក អាចទៅទស្សនាទីបញ្ចុះសពនៅ St. Petersburg ។
ទីភ្នាក់ងារសារព័ត៌មាន TASS របស់រុស្ស៊ី ដែលដកស្រង់ប្រភពបានរាយការណ៍ថា ស្របតាមការចង់បានរបស់គ្រួសារលោក Prigozhin មានតែសមាជិកគ្រួសារ និងមិត្តភក្តិជិតស្និទ្ធរបស់លោកប៉ុណ្ណោះដែលត្រូវបានអញ្ជើញឱ្យចូលរួមក្នុងពិធីបុណ្យសព។
យន្តហោះឯកជនរុស្ស៊ីមួយគ្រឿង បានធ្លាក់កាលពីថ្ងៃទី២៣ ខែសីហា នៅតំបន់ Tver នៃប្រទេសរុស្ស៊ី ដែលកំពុងធ្វើដំណើរពីទីក្រុងមូស្គូ ទៅកាន់ទីក្រុង St. Petersburg ដោយបានសម្លាប់អ្នកដំណើរ និងសមាជិកនាវិកទាំងអស់នៅលើយន្តហោះ។ លោក Prigozhin និងសមាជិកជាន់ខ្ពស់មួយចំនួនរបស់ Wagner ស្ថិតក្នុងចំណោមជនរងគ្រោះ មូលហេតុនៃការធ្លាក់យន្តហោះនេះកំពុងស្ថិតក្រោមការស៊ើបអង្កេតនៅឡើយ៕ ប្រែសម្រួល ឈូក បូរ៉ា
