បរទេស៖ មនុស្សចំនួន ១១ នាក់នៅខេត្ត Dong Nai ភាគខាងត្បូង កាលពីថ្ងៃចន្ទត្រូវបានកាត់ទោស ឱ្យជាប់ពន្ធនាគារ ពីបទជួញដូរមនុស្ស រាប់រយនាក់មកកម្ពុជា។
យោងតាមសារព័ត៌មាន VN Express ចេញផ្សាយកាលពីថ្ងៃទី២៦ ខែកញ្ញា ឆ្នាំ២០២៣ បានឱ្យដឹងថា លោក Vuong Van Thanh អាយុ ៣៦ឆ្នាំ ត្រូវបានតុលាការប្រជាជនខេត្ត Dong Nai កាត់ទោសឱ្យជាប់ពន្ធនាគារ រយៈពេល ១២ឆ្នាំកន្លះ ពីបទជួញដូរមនុស្ស។ មនុស្ស១០នាក់ផ្សេងទៀត ត្រូវបានកាត់ទោសឱ្យជាប់គុកពី ៣ ឆ្នាំកន្លះទៅ ៨ឆ្នាំ ក្នុងនាមជាអ្នកសមគំនិតជាមួយឈ្មោះ Thanh ឬពីបទរៀបចំការធ្វើចំណាកស្រុកខុសច្បាប់។
ចាប់ពីខែកុម្ភៈ ដល់ខែមិថុនា ឆ្នាំ ២០២២ ឈ្មោះ Thanh និងអ្នកសមគំនិត៣នាក់បានប្រើគណនីអនឡាញ ដើម្បីជ្រើសរើសកម្មករ ដោយសន្យាថា ពួកគេទទួលបានប្រាក់ចំណូលខ្ពស់ ដើម្បីទាក់ទាញពួកគេមកប្រទេសកម្ពុជាដើម្បីធ្វើការ ។ សម្រាប់អ្នកដែលបញ្ជូនមកកម្ពុជាម្នាក់ៗ ឈ្មោះ Thanh នឹងទទួលបាន ៦០០ ដុល្លារជាការទូទាត់ ។
បន្ទាប់មកក្រុមនេះ បានបញ្ជូនកម្មករទៅក្រុមហ៊ុនជាច្រើន ដែលមានមូលដ្ឋាន នៅក្នុងប្រទេសកម្ពុជា និងគ្រប់គ្រងដោយជនជាតិចិន ដូច្នេះពួកគេអាចត្រូវបានគេកេងប្រវ័ញ្ច ។ កម្មករត្រូវធ្វើការបន្ថែមម៉ោង ធ្វើការហៅឆបោក និងបញ្ចុះបញ្ចូលអ្នកផ្សេងទៀតឱ្យលេងល្បែង ក្នុងចំណោមការងារផ្សេងទៀត ក្រោមការត្រួតពិនិត្យយ៉ាងជិតស្និទ្ធ។
ប្រសិនបើកម្មករចង់ត្រឡប់មកប្រទេសវៀតណាមវិញ គ្រួសាររបស់ពួកគេនឹងត្រូវបង់ថ្លៃលោះ ដល់ក្រុមនៅក្នុងប្រទេសកម្ពុជា ដែលមានចាប់ពី ៦១-១៣០ លានដុង (២៥០០-៥៣០០ ដុល្លារអាមេរិក) ក្នុងមនុស្សម្នាក់ ។ សង្វៀនជួញដូរមនុស្ស ត្រូវបានចាប់ខ្លួន ដោយសារការអំពាវនាវសុំជំនួយ ពីជនរងគ្រោះកាលពីខែកក្កដាឆ្នាំមុន ៕
ប្រែសម្រួលៈ ណៃ តុលា
