ហ្គាហ្សា៖ ប្រភពពីប៉ាឡេស្ទីនបានឲ្យដឹងថា យ៉ាងហោចណាស់ជនជាតិប៉ាឡេស្ទីន ២៥នាក់ត្រូវបានសម្លាប់ និងមួយចំនួនទៀតបានរងរបួសនៅក្នុងការវាយប្រហារតាមអាកាសរបស់អ៊ីស្រាអែល សំដៅទៅលើសាលារៀនមួយនៅក្នុងទីក្រុងខាន់ យូនីស នៅភាគខាងត្បូងហ្គាហ្សាស្ទ្រីប។
ប្រភពសន្តិសុខបានប្រាប់កាសែតស៊ិនហួ ឲ្យដឹងថាយន្តហោះអ៊ីស្រាអែល បានកំណត់គោលដៅទៅកាន់ច្រកទ្វារនៃសាលា Al-Awda ដែលផ្ទុកអ្នកផ្លាស់ទីលំនៅរាប់រយនាក់នៅក្នុងទីប្រជុំជន Abasan al-Kabira ភាគខាងកើតនៃទីក្រុងខាន់ យូនីស ដោយប្រើប្រាស់មីស៊ីលមួយគ្រាប់។
វីដេអូដែលបានចែករំលែកដោយសកម្មជនប៉ាឡេស្ទីននៅលើប្រព័ន្ធផ្សព្វផ្សាយសង្គម Facebook បានបង្ហាញសាកសពរាប់សិបនាក់ដេកនៅនឹងដីដោយប្រឡាក់ដោយឈាមពេញខ្លួន។
ប្រភពវេជ្ជសាស្ត្របានឲ្យដឹងថា ការវាយប្រហារតាមអាកាសរបស់អ៊ីស្រាអែល បានសម្លាប់មនុស្សយ៉ាងហោចណាស់ ២៥នាក់ រួមទាំងស្ត្រី និងកុមារ និងរាប់សិបនាក់រងរបួសក្នុងកម្រិតផ្សេងៗគ្នា។
ប្រភពបានប្រាប់កាសែតស៊ិនហួឲ្យដឹងថា ចំនួនជនរងគ្រោះត្រូវបានគេរំពឹងថា នឹងកើនឡើងដោយសារតែចំនួនមនុស្សច្រើនពេកនៅក្នុងតំបន់ នេះបើយោងតាមការចុះផ្សាយរបស់ទីភ្នាក់ងារសារព័ត៌មានចិនស៊ិនហួ។
កងកម្លាំងការពារអ៊ីស្រាអែល (IDF) បាននិយាយនៅក្នុងសេចក្តីថ្លែងការណ៍មួយកាលពីថ្ងៃពុធថា ដោយប្រើគ្រាប់រំសេវយ៉ាងជាក់លាក់ កងកម្លាំងអាកាសអ៊ីស្រាអែល បានវាយប្រហារភេរវករម្នាក់ពីក្រុមយោធារបស់ក្រុមហាម៉ាស់ ដែលបានចូលរួមក្នុងការវាយលុករបស់ក្រុមហាម៉ាស់នៅភាគខាងត្បូងប្រទេសអ៊ីស្រាអែល កាលពីឆ្នាំមុន ក្នុងចំណោមសកម្មភាពភេរវករផ្សេងទៀត៕ ប្រែសម្រួល ឈូក បូរ៉ា
![](https://dap-news.com/wp-content/uploads/2020/08/1-1.png)