យូអិន៖ លោក Fu Cong តំណាងអចិន្ត្រៃយ៍របស់ចិនប្រចាំអង្គការសហប្រជាជាតិ បានជំរុញឱ្យអ៊ីស្រាអែលធ្វើតាមការអំពាវនាវ ដ៏ខ្លាំងក្លារបស់សហគមន៍អន្តរជាតិ ដោយបញ្ឈប់ជាបន្ទាន់នូវវត្តមានខុសច្បាប់ របស់ខ្លួននៅក្នុងទឹកដីប៉ាឡេស្ទីនដែលកាន់កាប់។
នៅក្នុងការកត់សម្គាល់នៅឯសម័យប្រជុំពិសេស នៃមហាសន្និបាតអង្គការសហប្រជាជាតិ ស្តីពីបញ្ហាប៉ាឡេស្ទីន លោក Fu បានលើកឡើងថា ការកាន់កាប់ និងការគៀបសង្កត់ជាច្រើនទស្សវត្សរ៍បានធ្វើឱ្យមានការរងទុក្ខវេទនា ដែលមិនអាចបំភ្លេចបានដល់ប្រជាជនប៉ាឡេស្ទីន ហើយបានធ្វើឱ្យក្តីសុបិនដ៏យូរលង់នៃភាពជារដ្ឋឯករាជ្យកាន់តែពិបាកយល់។
លោកបានសង្កត់ធ្ងន់ថា “ការបញ្ចប់ការកាន់កាប់នេះមិនមែនជាជម្រើសនោះទេ ប៉ុន្តែជាកាតព្វកិច្ចផ្លូវច្បាប់សម្រាប់អ៊ីស្រាអែល” នេះបើយោងតាមការចុះផ្សាយរបស់ទីភ្នាក់ងារសារព័ត៌មានចិនស៊ិនហួ។
តុលាការយុត្តិធម៌អន្តរជាតិ (ICJ) នៅក្នុងមតិយោបល់របស់ខ្លួនដែលបានចេញផ្សាយកាលពីថ្ងៃទី១៩ ខែកក្កដា បានសន្និដ្ឋានយ៉ាងច្បាស់លាស់ថា ការបន្តវត្តមានរបស់អ៊ីស្រាអែលនៅក្នុងទឹកដីប៉ាឡេស្ទីន ដែលកាន់កាប់ គឺជាការរំលោភលើច្បាប់អន្តរជាតិ ហើយថាអ៊ីស្រាអែលស្ថិតនៅក្រោមកាតព្វកិច្ច ដើម្បីបញ្ចប់ជាបន្ទាន់។
លោកបន្ដថា វត្តមានដោយខុសច្បាប់របស់អ៊ីស្រាអែល នៅក្នុងទឹកដីប៉ាឡេស្ទីន ដែលខ្លួនកាន់កាប់ មតិយោបល់របស់ ICJ បញ្ជាក់ពីការយល់ស្របដ៏យូរអង្វែងរបស់សហគមន៍អន្តរជាតិ និងបញ្ជាក់ពីចំណុចស្នូលនៃសំណួរប៉ាឡេស្ទីន។
លោកបានបន្ដថា “យើងជំរុញឱ្យអ៊ីស្រាអែលធ្វើតាមការអំពាវនាវដ៏ខ្លាំងក្លារបស់សហគមន៍អន្តរជាតិដោយបញ្ចប់ភ្លាមៗនូវវត្តមានខុសច្បាប់របស់ខ្លួននៅក្នុងទឹកដីប៉ាឡេស្ទីន ដែលខ្លួនកាន់កាប់” ។
លោកបានកត់សម្គាល់ថា ការបញ្ចប់ការកាន់កាប់គឺដើម្បីដោះស្រាយភាពអយុត្តិធម៌ជាប្រវត្តិសាស្ត្រ ហើយសំខាន់ជាងនេះទៅទៀត គឺចាក់គ្រឹះសម្រាប់សន្តិភាព នេះបើយោងតាមការចុះផ្សាយរបស់ទីភ្នាក់ងារសារព័ត៌មានចិនស៊ិនហួ។
ដោយគូសបញ្ជាក់ថា ភាពជារដ្ឋឯករាជ្យ គឺជាសិទ្ធិមិនអាចកាត់ផ្តាច់បានរបស់ប្រជាជនប៉ាឡេស្ទីនក្នុងនាមជាប្រជាជាតិមួយ លោកឯកអគ្គរដ្ឋទូតបានបន្ថែមថា ការកាន់កាប់ខុសច្បាប់ដ៏យូរបានរារាំងដល់ការសម្រេចបាននូវការសម្រេចចិត្តដោយខ្លួនឯងរបស់ប្រជាជនប៉ាឡេស្ទីន និងបានផ្តល់ឱ្យអ៊ីស្រាអែល នូវសិទ្ធិវេតូផ្តាច់មុខលើប៉ាឡេស្ទីន ដែលនេះជាការមិនអាចទទួលយកបាន”៕
ប្រែសម្រួល ឈូក បូរ៉ា
