បរទេស៖ មន្ត្រីនៅអាកាសយានដ្ឋានសុវណ្ណភូមិ ប្រទេសថៃ បាននិយាយថា ពួកគេបានទទួលការគំរាមកំហែងគ្រាប់បែកទាក់ទងនឹងជើងហោះហើរ Thai VietJet Air ដែលធ្វើដំណើរពីទីក្រុងដាណាងកាលពីថ្ងៃព្រហស្បតិ៍ ប៉ុន្តែមិនបានរកឃើញសារធាតុផ្ទុះទេ ហើយអ្នកដំណើរ និងនាវិកទាំងអស់មានសុវត្ថិភាព។
យោងតាមសារព័ត៌មាន បាងកក ប៉ុស្តិ៍ ចេញផ្សាយកាលពីថ្ងៃទី២៦ ខែកញ្ញា ឆ្នាំ២០២៤ បានឱ្យដឹងថា លោក Kittipong Kittikachorn អ្នកគ្រប់គ្រងទូទៅរបស់ព្រលានយន្តហោះបាននិយាយនៅក្នុងសេចក្តីថ្លែងការណ៍មួយកាលពីល្ងាចថ្ងៃព្រហស្បតិ៍ថា “ឧបទ្ទវហេតុនេះមិនប៉ះពាល់ដល់ប្រតិបត្តិការទាំងមូលរបស់ព្រលានយន្តហោះនោះទេ” ។
ចាប់តាំងពីពេលនោះមក វិធានការសង្គ្រោះបន្ទាន់ត្រូវបានដកចេញ ហើយអ្នកដំណើរដែលសង្ស័យថា បានបង្កការគម្រាមកំហែងនោះ ត្រូវបានប្រគល់ទៅឱ្យប៉ូលីស ដើម្បីធ្វើការស៊ើបអង្កេតបន្ថែម។
ក្រុមមន្ត្រីបាននិយាយថា ការជូនដំណឹងដំបូងដែលពួកគេទទួលបាននៅម៉ោង ២ និង៤៥ នាទី រសៀលថា មានការគំរាមកំហែងដោយគ្រាប់បែកនៅលើជើងហោះហើរ VZ 961 ពីទីក្រុង ដាណាង ប្រទេសវៀតណាមទៅកាន់អាកាសយានដ្ឋានសុវណ្ណភូមិ។ យន្តហោះនេះដឹកអ្នកដំណើរ១២០នាក់ សមាជិកនាវិក៦នាក់ និងកាបូបត្រួតពិនិត្យ៦១។
ពេលយន្តហោះចុះចត អ្នកដំណើរបានរាយការណ៍ថាមានការគំរាមពីស្ត្រីជនជាតិប៉ូឡូញម្នាក់ ហើយដែលត្រូវបានគេនាំទៅប៉ុស្តិ៍ប៉ូលិសសុវណ្ណភូមិ។ អាជ្ញាធរបានកំណត់ថា ស្ត្រីរូបនោះមិនបានរៀបចំធ្វើការបំផ្លិចបំផ្លាញ ឬបំផ្ទុះគ្រាប់បែកនោះទេ ប៉ុន្តែបានត្រឹមតែប្រើពាក្យហាមឃាត់ពេលជិះយន្តហោះដោយគ្មានចេតនាព្យាបាទ៕
ប្រែសម្រួលៈ ណៃ តុលា
