ប្រធានាធិបតី គីម ជុងអ៊ុនថា នុយក្លេអ៊ែររបស់កូរ៉េខាងជើង គឺអាចគំរាមកំហែងអាមេរិកបាន
បរទេស៖ មេដឹកនាំកូរ៉េខាងជើង លោក គីម ជុងអ៊ុន បាននិយាយថា ប្រទេសកូរ៉េខាងជើង អាចបង្កការគំរាមកំហែង នុយក្លេអ៊ែរ ដ៏គួរឱ្យទុកចិត្តដល់សហរដ្ឋអាមេរិក ផ្ទុយពីការក្លាយជាគោលដៅ សម្រាប់ការប៉ុនប៉ង របស់អាមេរិកក្នុងការបង្ហាញតែអំណាច ។
យោងតាមសារព័ត៌មាន RT ចេញផ្សាយ នៅថ្ងៃទី២៤ ខែមីនា ឆ្នាំ២០២៦ថា ថ្លែងក្នុងសុន្ទរកថា គោលនយោបាយទៅកាន់ សមាជិកសភាដែលទើបជាប់ឆ្នោតថ្មីនៅថ្ងៃចន្ទ លោក គីម បានសង្កត់ធ្ងន់លើតួនាទី នៃអាវុធនុយក្លេអ៊ែរ ក្នុងការធានាសន្តិសុខជាតិ។
លោកបានចោទទីក្រុងវ៉ាស៊ីនតោនថា បានអនុវត្ត “ភេរវកម្ម និងការឈ្លានពានរបស់រដ្ឋ” នៅទូទាំងពិភពលោក ដោយអះអាងថា សកម្មភាពបែបនេះបង្ហាញពីភាពត្រឹមត្រូវ នៃការព្រួយបារម្ភ របស់ទីក្រុងព្យុងយ៉ាង អំពីវត្តមានយោធាអាមេរិកនៅក្នុងតំបន់ រួមទាំងការដាក់ពង្រាយពាក់ព័ន្ធនឹង ទ្រព្យសម្បត្តិដែលមានសមត្ថភាពនុយក្លេអ៊ែរ។ យោងតាមលោក គីម គឺ ឃ្លាំងអាវុធនុយក្លេអ៊ែររបស់កូរ៉េខាងជើង ផ្តល់នូវការការពារដ៏រឹងមាំប្រឆាំង នឹងការវាយប្រហារ ដែលអាចកើតមាន។
កូរ៉េខាងជើងបានដកខ្លួនចេញពីសន្ធិសញ្ញា មិនរីកសាយភាយនុយក្លេអ៊ែរក្នុងឆ្នាំ ២០០៣ ដើម្បីបន្តកម្មវិធីអាវុធរបស់ខ្លួន។ ចាប់តាំងពីពេលនោះមក កូរ៉េខាងជើង បានអភិវឌ្ឍក្បាលគ្រាប់ នុយក្លេអ៊ែរ និងមីស៊ីលផ្លោងដែលគេជឿថា មានសមត្ថភាពបាញ់ដល់ដី គោកសហរដ្ឋអាមេរិក ក្នុងចំណោមគោលដៅ ដែលអាចកើតមានផ្សេងទៀត។ ទោះបីជាមានទណ្ឌកម្មអន្តរជាតិ និងសំណើផ្តល់ការ លើកទឹកចិត្តសេដ្ឋកិច្ច សម្រាប់ការរំសាយអាវុធនុយក្លេអ៊ែរ – ដែលជារឿយៗត្រូវបានគេហៅថា “គំរូលីប៊ី” – ទីក្រុងព្យុងយ៉ាងបានបន្ត កិច្ចខិតខំប្រឹងប្រែងរបស់ខ្លួន។
លោក គីម បានអះអាងថា កម្មវិធីនុយក្លេអ៊ែរ បានផ្តល់អត្ថប្រយោជន៍ លើសពីការការពារ ដោយអះអាងថា វាបានគាំទ្រដល់វឌ្ឍនភាពវិទ្យាសាស្ត្រ និងការអភិវឌ្ឍសេដ្ឋកិច្ច៕
ប្រែសម្រួលៈ ណៃ តុលា
