ព័ត៌មានជាតិ

សមាគមTYDA ចុះផ្តល់ស្នាមញញឹមថ្មី ដល់ក្មួយៗ នៅក្នុងសាលាបឋម សិក្សាភូមិធំ

ភ្នំពេញ៖ នាចុងសប្តាហ៍នេះ សមាគមគ្រូពេទ្យស្ម័គ្រចិត្ត យុវជនសម្តេចតេជោ(TYDA) បានចុះផ្តល់ស្នាមញញឹម ដល់ក្មួយៗកុមារ នៅក្នុងសាលាបឋមសិក្សាភូមិធំ សង្កាត់ពញាពន់ ខណ្ឌព្រែកព្នៅ រាជធានីភ្នំពេញ តាមរយៈបេសកកម្មថ្មីគឺTYDA ចុះតាមសាលារៀន ដែលជាកម្មវិធីអប់រំសុខភាពកុមារទូទៅ សុខភាពមាត់ធ្មេញ និងពិនិត្យជំងឺមាត់ធ្មេញកុមារ។

លោកវេជ្ជបណ្ឌិតស៊ឹម ស៊ូយេង អនុប្រធានប្រតិបត្តិសមាគមគ្រូពេទ្យស្ម័គ្រចិត្ត យុវជនសម្ដេចតេជោទទួលបន្ទុក បេសកកម្ម TYDAចុះតាមសាលារៀន បានបញ្ជាក់ថា គោលបំណងនៃបេសកកម្មនេះគឺជួយជំរុញសុខភាព មាត់ធ្មេញកុមារដោយប្រើប្រាស់វិធីសាមញ្ញៗដែលអាចការពារ ការឈឺចាប់ រោគពុកធ្មេញ និងការបង្ការរោគផ្សេងៗ តាមរយៈការអប់រំសុខភាពទូទៅដោយផ្ដោត លើអនាម័យសុវត្ថិភាពអាហារក្នុងសាលា និងជំងឺរលាកផ្លូវដង្ហើមCovid 19 និងជំងឺមាត់ធ្មេញ។

លោក ឃួង ស្រេង អភិបាលនៃគណៈអភិបាលរាជធានីភ្នំពេញ បានផ្ដល់ដំបូន្មានល្អដល់ក្មួយៗសិស្សានុសិស្សរស់នៅស្អាត ហូបស្អាត ផឹកស្អាតដើម្បីសុខភាពល្អហើយរៀនឲ្យបានពូកែ ដើម្បីក្លាយជាកូនល្អ សិស្សល្អមិត្តល្អនៅក្នុងសង្គម។

គណៈគ្រប់គ្រងសាលា លោកគ្រូអ្នកគ្រូ និងសិស្សានុសិស្ស បានគោរពថ្លែង អំណរគុណដ៏ជ្រាលជ្រៅ ចំពោះលោកហ៊ុន ម៉ាណែត និងលោកស្រី ពេជ ចន្ទមុន្នី ប្រធានក្រុមប្រឹក្សាភិបាលសមាគមគ្រូពេទ្យស្ម័គ្រចិត្តយុវជនសម្តេចតេជោ និងក្រុមការងារគ្រូពេទ្យសមាគម TYDA ដែលបានយកចិត្តទុកដាក់ចំពោះសុខទុក្ខ ការសិក្សារស់នៅ និងសុខភាពរបស់ក្មួយនៅទីនេះ។

សូមបញ្ជាក់ថា នេះគឺជាបេសកកម្មថ្មីមួយទៀត របស់សមាគមTYDA ចុះតាមសាលារៀន ដើម្បីអប់រំសុខភាពទូទៅ ជំងឺមាត់ធ្មេញ និងពិនិត្យព្យាបាលជំងឺមាត់ធ្មេញជូនដល់ក្មួយៗ សិស្សានុសិស្ស។ ជាក់ស្ដែងនៅថ្ងៃនេះ បានអប់រំសុខភាព និងព្យាបាលជំងឺមាត់ធ្មេញជូនដល់ក្មួយៗសិស្សានុសិស្សចំនួន៤៩៦នាក់។

បំរាម៖ ហាមយកព័ត៌មានរបស់សារព័ត៌មាន ដើមអម្ពិល ចុះផ្សាយដោយគ្មានការជូនដំណឹងមកជាមុន។ រាល់បញ្ហាអត្ថបទដែលយកចុះផ្សាយបន្ត ស្ថាប័នយើងខ្ញុំមិនទទួលខុសត្រូវឡើយ។ លោកអ្នកអាចទំនាក់ំទំនងមកក្រុមការងារតាមរយៈ​ទូរស័ព្ទលេខ៖ 012 722337 ឬ dapnews@gmail.com

All rights reserved by: DAP News

To Top