ភ្នំពេញ៖ ក្រោយពីក្រសួងសុខាភិបាល ធ្វើការព្យាបាល អ្នកជំងឺកូវីដ១៩ ជាសះស្បើយអស់នៅកម្ពុជា រដ្ឋបាលរាជធានីភ្នំពេញ សង្កេតឃើញថា ប្រជាពលរដ្ឋ មិនមានការភ័យខ្លាច និងបាត់ការប្រុងប្រយ័ត្ន ចំពោះជំងឺនេះ ជាពិសេសនៅតាមភោជនីយដ្ឋាន និងអាហារដ្ឋានមួយចំនួន ខ្វះការប្រុងប្រយ័ត្នផងនោះ នៅថ្ងៃទី១៨ ខែឧសភា ឆ្នាំ២០២០នេះ រដ្ឋបាលរាជធានីភ្នំពេញ បានជូនដំណឹង ស្តីពីការក្រើនរំលឹក និងណែនាំ ដល់ម្ចាស់ភោជនីយដ្ឋាន និងអាហារដ្ឋាន នៅរាជធានីភ្នំពេញ ឲ្យមានការប្រុងប្រយ័ត្នខ្ពស់ ។
យោងតាមសេចក្តីជូនដំណឹង របស់រដ្ឋបាលរាជធានីភ្នំពេញ បានធ្វើការណែនាំ ៣ចំណុចជា៖
១. ម្ចាស់អាជីវកម្មភោជនីយដ្ឋាន និងអាហារដ្ឋានទាំងអស់ នៅរាជធានីភ្នំពេញ ត្រូវគោរពឲ្យបានត្រឹមត្រូវ តាមការណែនាំ របស់ក្រសួងសុខាភិបាល ស្តីពីផែនការទប់ស្កាត់ ការរីករាលដាល នៃជំងឺកូវីដ១៩។
២. ត្រូវរៀបចំអោយមានទឹកអាល់កុល ឬជែល សម្រាប់លាងដៃ នៅមុខច្រកទ្វារចេញ-ចូល និងត្រូវចាត់តាំងបុគ្គលិក ធ្វើការវាស់កំដៅ ភ្ញៀវទាំងអស់ មុននឹងអនុញ្ញាត អោយចូលក្នុង ភោជនីយដ្ឋាន ឬអាហារដ្ឋាន ។
៣. ត្រូវរក្សាគម្លាតសង្គម អោយបានត្រឹមត្រូវ តាមការណែនាំ របស់ក្រសួងសុខាភិបាល ។
រដ្ឋបាលរាជធានីភ្នំពេញ បានគូសបញ្ជាក់ថា “ក្នុងករណីម្ចាស់ភោជនីយដ្ឋាន និងអាហារដ្ឋានណា មិនអនុវត្តតាមការណែនាំនេះ រដ្ឋបាលរាជធានីភ្នំពេញ នឹងបិទអាជីវកម្មភោជនីយដ្ឋាន និងអាហារដ្ឋាននោះ ជាបណ្តោះអាសន្ន” ។
សូមបញ្ជាក់ថា ប្រទេសកម្ពុជា រកឃើញករណីជំងឺកូវីដ១៩ ដំបូងបំផុត នៅថ្ងៃទី២៧ មករា ២០២០ និងបានព្យាបាល អ្នកជំងឺកូវីដ-១៩ ដែលកើត នៅកម្ពុជា ១២២នាក់ ជាសះស្បើយ១០០%ផងដែរ៕
