ភ្នំពេញ៖ ក្រុមហ៊ុន ខេ ស៊ីមេន បានប្រារព្ធពិធីក្រុងពាលី សម្ពោធដំណើរការ ផលិតនូវផលិតផលស៊ីម៉ងត៍ ដែលអភិវឌ្ឍថ្មីរបស់ខ្លួន ជាមួយនឹងសំបកបាវថ្មី នៅឯរោងចក្រ កំពត ស៊ីមេន របស់ខ្លួន នៅខេត្តកំពត ។
លោក រ៉ាត់ឆាយុត កាសេមឆៃសិរី (Ratchayut Kasemchaisiri) នាយកក្រុមហ៊ុន អេសស៊ីជី ប្រចាំកម្ពុជា បានដឹកនាំគណៈគ្រប់គ្រង ជាន់ខ្ពស់ដទៃទៀត ដើម្បីរៀបចំប្រារព្ធពិធីសម្ពោធនេះ និងបានធ្វើដំណើរទស្សនកិច្ច ពិនិត្យមើលខ្សែ សង្វាក់ផលិតកម្ម នៅក្នុងរោងចក្រ កំពត ស៊ីមេន ។
ពិធីសម្ពោធនេះ បានធ្វើឡើងកាលពីថ្ងៃទី១២ ខែកុម្ភៈ គឺមួយសប្ដាហ៍ បន្ទាប់ពីពិធីជួបជុំតំណាងចែកចាយប្រចាំឆ្នាំ ដែលក្រុមហ៊ុន ខេ ស៊ីមេន បានរៀបចំឡើង ដើម្បីបង្ហាញការផ្លាស់ប្ដូររូបរាងថ្មី រូបមន្តថ្មី និងផលិតផលថ្មីរបស់ស៊ីម៉ងត៍ ខេ ស៊ីមេន ទៅដល់តំណាងចែកចាយ និងដៃគូអភិវឌ្ឍន៍ គម្រោងសំណង់ មកពីទូទាំងប្រទេស ។
លោក រ៉ាត់ឆាយុត កាសេមឆៃសិរី នាយកក្រុមហ៊ុន អេសស៊ីជី ប្រចាំកម្ពុជា បានមានប្រសាសន៍ នៅឯពិធីក្រុងពាលី ក្នុងបរិវេណរោងចក្រ កំពត ស៊ីមេន នៅខេត្តកំពត យ៉ាងដូច្នេះ ៖ «នៅឆ្នាំ២០២១នេះ យើងចាប់ផ្ដើមទសវត្សរ៍ថ្មី ជាមួយនឹងការអភិវឌ្ឍទម្រង់ថ្មី សម្រាប់ស៊ីម៉ងត៍ ខេ ស៊ីមេន ។ ការអភិវឌ្ឍថ្មីនេះ គឺផ្ដើមចេញពីមហិច្ឆតា ដ៏រឹងមាំរបស់យើង ដើម្បីរក្សាភាពឈានមុខគេរបស់យើង នៅក្នុងចំណែកទីផ្សារ និងភាពល្អប្រណីតលើសគេ ផ្នែកម៉ាកយីហោ ។»
លោក រ៉ាត់ឆាយុត បានបន្ថែមថា ៖ «គោលដៅចុងក្រោយបំផុតរបស់យើង គឺនាំមកនូវនវានុវត្តន៍ និងកំណើនប្រកបដោយចីរភាព សម្រាប់វិស័យសំណង់និងការរស់នៅ នៅកម្ពុជា ដែលនឹងផ្ដល់គុណភាពរស់នៅ កាន់តែប្រសើរឡើង ដល់ប្រជាជនកម្ពុជាគ្រប់រូប ។»
ស៊ីម៉ងត៍ ខេ ស៊ីមេន ឥឡូវនេះ មានសំបកបាវថ្មី ហើយរចនាបថនៃសំបកបាវថ្មីនេះ គឺកើតចេញពីឆន្ទៈមុះមុតរបស់យើង ក្នុងការបោះជំហានឲ្យលឿនឆ្ពោះ ទៅរកអនាគត ដោយប្រើកេរដំណែល និងបទពិសោធន៍របស់យើង ក្នុងនាមជាម៉ាកយីហោខ្មែរ ដំបូងគេបំផុត នៅក្នុងទីផ្សារកម្ពុជា ។ ស៊ីម៉ងត៍ ខេ ស៊ុបពែរ មានរូបមន្តថ្មី ។ វាត្រូវបានអភិវឌ្ឍឲ្យក្លាយជាស៊ីម៉ងត៍ ដែលអាចប្រើបាន សម្រាប់ការងារចម្រុះ ។ អ្នកប្រើប្រាស់នឹងវាយតម្លៃខ្ពស់ចំពោះគុណតម្លៃរបស់ ខេ ស៊ុបពែរ ជាស៊ីម៉ងត៍មួយប្រភេទ សម្រាប់ការងារចម្រុះគ្រប់មុខ គឺការចាក់សាបនិងគ្រឿងបង្គុំស្រាលៗ ការរៀបឥដ្ឋ និងការងារបូក ។ រីឯផលិតផលថ្មី គឺ ស៊ីម៉ងត៍ ខេ ផោវើរ ផ្លាស្ទ័ររីង វិញ ត្រូវគេចាត់ទុកថា ជាស៊ីម៉ងត៍បូកដែលល្អបំផុត ដែលធ្វើឲ្យជញ្ជាំង មានភាពរលោងស្អាតបំផុត និងគ្មានស្នាមប្រេះ ៕
