ភ្នំពេញ៖ លោក សយ សុភាព អគ្គនាយកមជ្ឈមណ្ឌលសារព័ត៌មាន ដើមអម្ពិល បានអះអាងថា លោក បានប្រែក្លាយ ឱកាសរបស់ខ្លួន តាមរយៈបទពិសោធន៍ នៃការចុះយកព័ត៌មាន ក្នុងអំឡុងពេល ដែលមានការ ចរចាគ្នា រវាងខ្មែរនិងខ្មែរ ដើម្បីស្វែងរកសន្តិភាព។
ក្នុងបទសម្ភាសន៍ជាមួយ វិទ្យុបារាំង ជាខេមរៈភាសា ដែលចេញផ្សាយ នៅថ្ងៃទី២៣ ខែតុលា ឆ្នាំ២០២១ លោក សយ សុភាព បានលើកឡើងថា «ស្ថិតនៅក្នុងសម័យអន្តរកាល ដំណាក់កាលចរចា រវាងខ្មែរនិងខ្មែរ ដើម្បីស្វែងរកសន្តិភាព អំឡុងពេលបំពេញការងារ ជាអ្នកកាសែត នៅគ្រានោះមានភាពលំបាក។ តែលោកប្រែក្លាយ ការលំបាកជាឱកាស។»
លោក សយ សុភាព ថា លំបាកក្នុងនាម ជាអ្នកកាសែតព្រោះយើងថ្មី ទើបចូលប្រឡូកក្នុងអាជីព ជាអ្នកសារព័ត៌មាន។ តែក្រោយកិច្ចព្រមព្រៀង ក្រុងប៉ារីស២៣តុលា និងក្រោយការបោះឆ្នោតរៀបចំ ដោយអ៊ុនតាក់ ឆ្លងកាត់ការលំបាកនោះ ធ្វើឲ្យលោកមានបទពិសោធន៍ យល់ដឹងច្រើន រហូតធ្វើឲ្យលោកមានឱកាស ត្រូវបានថ្នាក់ដឹកនាំប្រទេស សម្ដេច ហ៊ុន សែន ហៅជិះឧទ្ធម្ភាគចក្រ ទៅដោះស្រាយបញ្ហាដីធ្លី នៅក្រុងព្រះសីហនុទៀតផង»។
សម្រាប់អ្នកកាសែតជើងចាស់រូបនេះ សមិទ្ធផលការងារដែលបន្សល់ទុក ក្រោយថ្ងៃ២៣ តុលា ដល់ពេលបច្ចុប្បន្ន ក្នុងនាមជាស្លាបប៉ាកា លោកបានជួបថ្នាក់ដឹកនាំកំពូលៗដូចជាៈ លោកនាយករដ្ឋមន្ត្រី ហ៊ុន សែន ដែលជាតួអង្គសំខាន់ម្នាក់ នៃកិច្ចព្រមព្រៀងក្រុងប៉ារីស។ ក្រៅពីនេះលោកបានជួបគាល់ សម្ដេចក្រុមព្រះនរោត្តម រណឬទ្ធិ លោក សម រង្ស៊ី និងបានជួបសន្ទនា ជាមួយអ្នកការទូត និងអនុរដ្ឋមន្ត្រីកាបរទេស ប្រទេសមហាអំណាចមួយចំនួន ជាដើម៕
