ព័ត៌មានជាតិ

អភិបាលខេត្តកំពង់ស្ពឺ បារម្ភ​ពីជំនន់ទឹកភ្លៀង ដែលបន្តហក់ឡើង

ភ្នំពេញ៖ លោក វ៉ី សំណាង អភិបាលខេត្តកំពង់ស្ពឺ នៅយប់ថ្ងៃទី២៤ តុលា នេះ បានព្រមាននិងបង្ហាញក្ដីបារម្ភ ចំពោះជំនន់ទឹកភ្លៀង នៅក្នុងភូមិសាស្រ្តខេត្តរបស់ខ្លួន ដោយសារភ្លៀងធ្លាក់ចំនួន៣ថ្ងៃ ដែលបណ្ដាលឱ្យទឹកស្ទឹងព្រែកត្នោត មានការហក់ឡើងគួរឲ្យព្រួយបារម្ភ និង ស្ទឹងក្រាំងពន្លៃ ស្ថានភាពគ្រប់គ្រងលែងបាន។

នៅលើគេហទំព័រហ្វេសប៊ុក លោកវ៉ី សំណាង បានសរសេរយ៉ាងដូច្នេះថា  «ទឹកភ្លៀងចំនួន 3 ថ្ងៃ ( ១៦, ២០, ២២ ) ធ្វើឲ្យទឹកស្ទឹងព្រែកត្នោតមានការហក់ឡើងគួរឲ្យព្រួយបារម្ភ។ ទឹកបានលេចតំបន់ទំនាបមួយចំនួននៅខាងត្បូងខេត្ត ( សង្កាត់ស្វាយក្រវ៉ាន់ ក្រុងច្បារមន, ឃុំរលាំងចក និង ឃុំរលាំងគ្រើល នៃស្រុកសំរោងទង ) ។ រីឯតំបន់មួយចំនួនផ្នែកខាងជើងក៏មានការជន់លេចដែរ ( ក្រុងច្បារមន, សង្កាត់កណ្ដោលដុំ, ឃុំតាំងក្រូច ) ។ ស្រុកបរសេដ្ឋនិងស្រុកគងពិសី កុំមានការជន់លិចមួយចំនួនដែរ»។

លោក វ៉ី សំណាង បន្ថែមថា «អ្វីដែលជាការព្រួយបារម្ភគឺស្ទឹងក្រាំងពន្លៃ ស្ថានភាពគ្រប់គ្រងលែងបានហើយ ដែលតម្រូវឲ្យអ្នកបច្ចេកទេស ត្រូវបើកទ្វាទឹកទាំង៦ ( កំពង់ស្ពឺ៣ទ្វា, កំពង់ឆ្នាំង៣ទ្វា ) ។ ទឹកនេះអាចបណ្ដាលឲ្យជន់លិច នៅផ្នែកខាងក្រោម គឺផ្លូវជាតិលេខ៥ និង ផ្សារឧត្តុង្គ»។

អាស្រ័យហេតុនេះ លោកអភិបាលខេត្ត រូបនេះ បានអំពាវនាវ ឱ្យ ពុកម៉ែមាមីងបងប្អូន មេត្តាមានការប្រុងប្រយ័ត្នឲ្យបានខ្ពស់។ 

លោកថា មន្ទីរកសិកម្ម ត្រូវត្រៀមពូជស្រូវ សម្រាប់ ចែកជូនបងប្អូននៅពេលដែលទឹកស្រក។ អាជ្ញាធរដែនដីគ្រប់ថ្នាក់ត្រូវ តាមដានពីស្ថានភាពទឹកឲ្យបានជាប់ ដើម្បីងាយស្រួល នៅក្នុងការជួយសង្គ្រោះពួកគាត់៕

បំរាម៖ ហាមយកព័ត៌មានរបស់សារព័ត៌មាន ដើមអម្ពិល ចុះផ្សាយដោយគ្មានការជូនដំណឹងមកជាមុន។ រាល់បញ្ហាអត្ថបទដែលយកចុះផ្សាយបន្ត ស្ថាប័នយើងខ្ញុំមិនទទួលខុសត្រូវឡើយ។ លោកអ្នកអាចទំនាក់ំទំនងមកក្រុមការងារតាមរយៈ​ទូរស័ព្ទលេខ៖ 012 722337 ឬ dapnews@gmail.com

All rights reserved by: DAP News

To Top
×