ព័ត៌មានជាតិ

សម្ដេច ស ខេង បញ្ជាឱ្យត្រួតពិនិត្យ ករណីអ្នកជាប់ពន្ធនាគារ អាចប្រើទូរសព្ទបញ្ជា ទៅខាងក្រៅបាន (Video)

ភ្នំពេញ៖ សម្ដេច ស ខេង ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ បានចេញបទបញ្ជាយ៉ាងម៉ឺងម៉ាត់ ឲ្យត្រួតពិនិត្យឡើងវិញ មិនឲ្យមានការប្រើប្រាស់ទូរសព្ទ ក្នុងពន្ធនាគារឡើយ ខណៈកន្លងមកអ្នកជាប់ទោស ក៏អាចបញ្ជាទៅខាងក្រៅបានដែរ តាមរយៈការប្រើទូរសព្ទ ក្នុងការប្រព្រឹត្តអំពើខុសច្បាប់ផ្សេងៗ។

ក្នុងពិធីសម្ពោធដាក់ឲ្យប្រើប្រាស់ មណ្ឌលយុវនីតិសម្បទា ស្ថិតនៅឃុំបារគូ ស្រុកកណ្ដាលស្ទឹង ខេត្តកណ្ដាល នាថ្ងៃទី២៨ ខែធ្នូ ឆ្នាំ២០២១ សម្ដេច ស ខេង បានណែនាំអគ្គនាយកដ្ឋានពន្ធនាគារ និងភាគីពាក់ព័ន្ធ ត្រូវផ្ដាច់ទំនាក់ទំនងរវាង អ្នកជាប់ពន្ធនាគារ និងអ្នកនៅខាងក្រៅ។ សម្ដេច ថា តាមបទពិសោធន៍នាពេលកន្លង នៅតាមពន្ធនាគារពិបាកគ្រប់គ្រង តាមរយៈ ដូចជា ៖ យកបាយម្ហូប ផ្លែឈើ និងរបស់ផ្សេងៗទៀត ហើយលួចដាក់ទូរសព្ទក្នុងរបស់ទាំងនោះ។

សម្ដេច មានប្រសាសន៍ថា «អ្នកនៅក្នុងពន្ធនាគារ បញ្ជាទៅលួច ទៅប្លន់ នៅខាងក្រៅ រួចហើយបញ្ជាទៅ រកស៊ីគ្រឿងញៀន នៅខាងក្រៅទៀត បញ្ជាបានទូទាំងប្រទេសតាមទូរសព្ទ នៅណាក៏បានបញ្ជាបានដែរ ឲ្យតែមានសេវាក្នុងគុកខេត្តកណ្ដាល ប៉ុន្ដែបញ្ជាដល់ស្វាយរៀង ព្រៃវែង កំពង់ចាម កោះកុង ជាដើម»។

ផ្ទាំងពាណិជ្ជកម្ម

សម្ដេច បន្ដថា អគ្គនាយកដ្ឋានពន្ធនាគារ ត្រូវត្រួតពិនិត្យឡើងវិញមិនអនុញ្ញាតឲ្យ ប្រើប្រាស់ទូរសព្ទក្នុងពន្ធនាគារឡើយ ប៉ុន្ដែឲ្យពួកគាត់ប្រើបាន តែត្រូវតាមដានយ៉ាងយកចិត្តទុកដាក់ ព្រមទាំង ថតសំឡេង ដើម្បីធានាសុវត្ថិភាពនាពេលក្រោយ។

សម្ដេច បញ្ជាក់ទៀតថា «គឺត្រូវត្រួតពិនិត្យ កុំឲ្យប្រើប្រាស់ និងមិនអនុញ្ញាតប្រើប្រាស់ទូរសព្ទ ឬមិនឲ្យមានសេវាទូរសព្ទ ឲ្យប្រើជាមួយ ឪពុក-ម្ដាយ ដើម្បីសួរទុកយើងជៀសមិនផុត យើងផ្ដាច់ ក៏មិនបានដែរ។ ប៉ុន្ដែយើងគ្រប់គ្រងឲ្យគាត់ និយាយអីទៅ ហើយថតសំឡេងទុក មិនមែនលុបបំបាច់សេរីភាពទេ ប៉ុន្ដែយើងត្រូវតាមដាន បើខ្លាចបាត់សិទ្ធិ ក៏មិនកើតដែល ព្រោះយើងដើម្បីការពារសិទ្ធិ»។

លើសពីនេះទៀត សម្ដេច ស ខេង ក៏បានណែនាំមន្រ្តីពន្ធនាគារ ត្រូវរៀបចំយ៉ាងណាធ្វើទៅតាមច្បាប់ ព្រោះមាន ក្រុមគ្រួសារបស់អ្នកជាប់ពន្ធនាគារ មកសួរសុខទុក្ខ ដូច្នេះ ត្រូវតាមដានយ៉ាងយកចិត្តទុកដាក់បំផុត។ សម្ដេច ក៏មានការព្រួយបារម្ភការចំពោះ ការកើនឡើងចំនួនអនីតិជន ដែលប្រព្រឹត្តិបទល្មើសផ្សេងៗ៕

To Top