ភ្នំពេញ៖សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា និងលោក ម៉ាក ស្ទែហ្វេន ប្រោន នាយករដ្ឋមន្ត្រីនៃកោះឃុក បានឯកភាពជាគោលការណ៍ ក្នុងការបង្កើតចំណងការទូតជាមួយគ្នា និងយល់ឃើញដូចគ្នាថាទំហំប្រទេសតូចឬធំ មិនគួរជាឧបសគ្គ នៃទំនាក់ទំនង និងកិច្ចសហប្រតិបត្តិការនោះឡើយ ។
ថ្នាក់ដឹកនាំទាំងពីរបានឯកភាពបែបនេះក្នុងជំនួបសម្តែងការគួរសមទ្វេភាគីនៅទីក្រុងហ្សាការតា នៃសាធារណរដ្ឋឥណ្ឌូនេស៊ី កាលពីថ្ងៃទី៧ ខែកញ្ញា ឆ្នាំ២០២៣ ក្នុងឱកាសថ្នាក់ដឹកនាំទាំងពីរ បានអញ្ជើញចូលរួម កិច្ចប្រជុំកំពូលអាស៊ាន និងកិច្ចប្រជុំពាក់ព័ន្ធនានា នៅទីនោះ ។
ក្នុងជំនួបនោះ លោក ម៉ាក ស្ទែហ្វេន ប្រោន (Mark Stephen BROWN) នាយករដ្ឋមន្ត្រីនៃកោះឃុក បានសម្តែងនូវការពេញចិត្ត ចំពោះឱកាសផ្លាស់ប្តូរយោបល់ និងស្វែងយល់គ្នាទៅវិញទៅមកនេះ ដែលនឹងកាន់តែជំរុញការផ្សារភ្ជាប់ទំនាក់ទំនង និងកិច្ចសហប្រតិបត្តិការល្អប្រសើរ រវាងប្រទេសទាំងពីរ ។
ក្នុងស្មារតីនេះ ថ្នាក់ដឹកនាំទាំងពីរ បានឯកភាពថា ទំហំប្រទេសតូចឬធំ មិនគួរជាឧបសគ្គនៃទំនាក់ទំនង និងកិច្ចសហប្រតិបត្តិការនោះឡើយ ប្រសិនបើភាគីទាំងពីរ ស្វែងរកបាននូវទស្សនវិស័យរួម ទិសដៅរួម និងឆន្ទៈ ក្នុងការសម្រេចនូវជោគវាសនារួម ។
ទំនាក់ទំនងរវាងកម្ពុជា និងកោះឃុក អាចចាប់ផ្តើមឡើងពីជំនួប និងបន្តទៅវិស័យដែលមានសក្កានុពល រវាងប្រទេសទាំងពីរ ដូចជាវិស័យកសិកម្ម និងវិស័យទេសចរណ៍ជាដើម ។
ក្នុងនោះ ថ្នាក់ដឹកនាំទាំងពីរ បានឯកភាពជាគោលការណ៍ ក្នុងការបង្កើតចំណងការទូតជាមួយគ្នា ដោយរដ្ឋមន្ត្រីការបរទេស នៃប្រទេសទាំងពីរ នឹងសិក្សារួមគ្នា ដើម្បីកំណត់នូវក្របខ័ណ្ឌរួម នៃការកសាងទំនាក់ទំនងការទូតនេះ ។
សូមបញ្ជាក់ថា កោះឃុក គឺជាដែនកោះ ដែលគ្រប់គ្រងដោយខ្លួនឯង នៅមហាសមុទ្រប៉ាស៊ីហ្វិកខាងត្បូង ក្នុងទំនាក់ទំនងសេរី ជាមួយនូវែលសេឡង់ ។នេះបើយោងតាមឯកសារ Wikipedia៕
