ម៉ូស្គូ៖ ក្រសួងការពារជាតិរុស្ស៊ី បានឲ្យដឹងថា យន្តហោះចម្បាំងរបស់រុស្ស៊ី Su-30 នៃតំបន់យោធាភាគខាងត្បូង ត្រូវបានចេញប្រតិបត្ដិការភ្លាមៗ ដើម្បីស្ទាក់ចាប់យន្ដហោះ របស់អាមេរិក និងបារាំង នៅលើសមុទ្រខ្មៅ នេះបើយោងតាមការចុះផ្សាយ របស់ទីភ្នាក់ងារ សារព័ត៌មានចិនស៊ិនហួ។
ប្រភពព័ត៌មានបានឲ្យដឹងថា ប្រព័ន្ធផ្សព្វផ្សាយដែនអាកាសរុស្ស៊ី បានរកឃើញគោលដៅអាកាស ខិតជិតព្រំដែនរុស្ស៊ី លើដែនទឹកអព្យាក្រឹតនៃសមុទ្រខ្មៅ។
ក្រុមអាកាសយានិក នៃយន្តហោះចម្បាំងរុស្ស៊ី Su-30 បានកំណត់អត្តសញ្ញាណរបស់ពួកគេថា ជាយន្តហោះឈ្លបយកការណ៍ យុទ្ធសាស្ត្រ RC-135 របស់កងទ័ពអាកាសសហរដ្ឋអាមេរិក, យន្តហោះបំពេញបន្ថែម កងទ័ពអាកាសអាមេរិក KC-135 និងយន្តហោះឈ្លបយកការណ៍ របស់កងទ័ពអាកាសបារាំង C-160G ។
ប្រភពបានឲ្យដឹងទៀតថា បន្ទាប់ពីយន្តហោះ បានហោះចេញពីព្រំដែនរដ្ឋរុស្ស៊ី យន្តហោះរុស្ស៊ីបានវិលត្រឡប់ មកអាកាសយានដ្ឋានរបស់ខ្លួនវិញ ដោយសុវត្ថិភាព។ សេចក្តីរាយការណ៍បានបន្ថែមទៀតថា យន្តហោះរបស់រុស្ស៊ី បានអនុវត្តយ៉ាងតឹងរឹង ជាមួយនឹងច្បាប់ដែនអាកាសអន្តរជាតិ៕ ដោយ៖ ឈូក បូរ៉ា
