ភ្នំពេញ៖ ក្នុងពេលអតីតមន្រ្តីនៃ អតីតបក្សប្រឆាំងសង្រ្គោះជាតិ និងសង្គមស៊ីវិលមួយចំនួនរិះគន់ លើការតែងតាំងមន្រ្តីជាជំនួយការ ឬទីប្រឹក្សាឲ្យមន្រ្តីជាន់ខ្ពស់នៃស្ថាប័នរដ្ឋ លោក សុខ ឥសាន ក្នុងនាមជាអ្នកនាំពាក្យ គណបក្សកាន់អំណាច បានបញ្ចេញប្រតិកម្មថា គណបក្សឈ្នះឆ្នោតមិនដែលយកសាច់ញាតិ របស់អតីតគណបក្សបក្សប្រឆាំង មកតែងតាំងទេ កុំឆ្ងល់។
លោក សុខ ឥសាន បានលើកឡើងក្នុងបណ្តាញសង្គម តេឡេក្រាមនាថ្ងៃ២៨ កុម្ភៈថា “ក្រុមឧទ្ទាមក្រៅច្បាប់និយាយ មិនដឹងខ្យល់ពីរឿងតែងតាំងទីប្រឹក្សា ។ បក្សឈ្នះឆ្នោតមិនដែល តែងតាំងមន្រ្តីរបស់បក្ស ចាញ់ឆ្នោតមកតែងតាំងទេ គេមិនដែលយកសាច់ញាតិ បក្សប្រឆាំងមកតែងតាំងទេ” ។
ការថ្លែងរបស់លោកនេះ បន្ទាប់ពីលោក ងឹម ញេង អតីតតំណាងរាស្ត្រនៃ អតីតគណបក្សសង្គ្រោះជាតិ និងអង្គការសង្គមស៊ីវិល បានរិះគន់ការតែងតាំងទីប្រឹក្សា និងសាច់ញាតិរបស់អនុប្រធានទី១ រដ្ឋសភា លោក ជាម យៀប ថាជារឿងឥតបានការ ក្នុងពេលដែលរដ្ឋាភិបាល ណែនាំមន្ត្រីឲ្យសន្សំសំចៃថវិកាជាតិ។ នេះបើតាមការចុះផ្សាយ របស់វិទ្យុអាស៊ីសេរី។
ចំពោះលោក ងឹម ញេងនេះ ត្រូវបានលោកសុខ ឥសាន វាយបកថា “ធ្លាប់ធ្វើតំណាងរាស្ត្រដែរ តែភ្លើមិនយល់ពីច្បាប់ និងមិនយល់ពីកិច្ចការតែងតាំង ទីប្រឹក្សាថ្នាក់ដឹកនាំស្ថាប័នដែរ”។
សូមបញ្ជាក់ថា ថ្មីៗនេះ ព្រះមហាក្សត្របាន ចេញព្រះរាជក្រឹត្យតែងតាំង ជំនួយការ និងទីប្រឹក្សាលោក ជាម យៀបចំនួន១៨នាក់ ហើយកាលពីខែវិច្ឆិកា ឆ្នាំ២០២១ ព្រះមហាក្សត្រក៏ចេញព្រះរាជក្រឹត្យ តែងតាំងមន្ត្រីខុទ្ទកាល័យ ទីប្រឹក្សាបច្ចេកទេស មន្ត្រីផ្នែកទំនាក់ទំនងសាធារណៈ ជំនួយការ និងលេខាធិការ១២នាក់ទៀត ដូច្នេះ លោកជាម យៀបមានមន្ត្រីអមខុទ្ទកាល័យ ជំនួយការ ទីប្រឹក្សា ចំនួន៣០នាក់ហើយ បន្ទាប់ពីលោកបានក្លាយជា អនុប្រធានទី១នៃរដ្ឋសភា ។ ក្នុងព្រះរាជក្រឹត្យតែងតាំង ជាមន្រ្តីខុទ្ទកាល័យ ជំនួយការ ឬទីប្រឹក្សា គឺមានកូនបង្កើត កូនប្រសារ និងចៅរបស់លោកជាម យៀបផងដែរ។ នេះបើតាមការចេញផ្សាយ របស់វិទ្យុអាស៊ីសេរី ៕
