ប៉េកាំង៖ ម៉ូឌុលមន្ទីរពិសោធន៍ Wentian និង Mengtian នឹងត្រូវបានបញ្ជូនទៅកាន់ ទីអវកាសនៅឆ្នាំនេះ ហើយនឹងក្លាយជាកន្លែង ធ្វើការកណ្តាលសម្រាប់អវកាសយានិក នៅក្នុងគន្លងគោចរ បន្ទាប់ពីការសាងសង់ស្ថានីយ៍អវកាស របស់ប្រទេសចិនត្រូវបានបញ្ចប់ នេះបើយោងតាមសន្និសីទសារព័ត៌មាន កាលពីថ្ងៃអាទិត្យ។
លោក Hao Chun នាយកទីភ្នាក់ងារអវកាសចិន បាននិយាយនៅក្នុង សន្និសីទសារព័ត៌មានថា ម៉ូឌុលមន្ទីរពិសោធន៍ Wentian នឹងត្រូវដាក់ឱ្យដំណើរការនៅខែកក្កដា និង Mengtian នៅក្នុងខែតុលា។
លោក Yang Hong ដែលជាប្រធានអ្នករចនា កម្មវិធីយានអវកាស China Manned Space Program នៅឯបណ្ឌិត្យសភាបច្ចេកវិទ្យាអវកាសចិន បានឲ្យដឹងថា ម៉ូឌុលទាំងពីរនេះត្រូវបាន បំពាក់ដោយទូពិសោធន៍ និងវេទិកាដំឡើង សម្រាប់បន្ទុកលើសទម្ងន់។ នៅក្នុងម៉ូឌុលមន្ទីរពិសោធន៍ទាំងពីរ អវកាសយានិក នឹងអាចស្រាវជ្រាវវិទ្យាសាស្ត្រអវកាស សម្ភារៈអវកាស ឱសថអវកាស និងការរុករកអវកាស។
ម៉ូឌុលមន្ទីរពិសោធន៍ Wentian ត្រូវបានបំពាក់ដោយកន្លែងរស់នៅ របស់អវកាសយានិកដូចគ្នានឹងម៉ូឌុលស្នូល Tianhe រួមទាំងកន្លែងដេកបីបន្ទប់ បង្គន់ និងផ្ទះបាយមួយ។ Wentian និង Tianhe អាចគាំទ្រដល់អវកាសយានិក ៦នាក់ ដែលរស់នៅក្នុងលំហរក្នុងអំឡុងពេលបង្វិល នៃនាវិកយានអវកាសពីរនាក់ ៕
ប្រែសម្រួល ឈូក បូរ៉ា
