បរទេស ៖ អគ្គលេខាធិការអង្គការ ណាតូលោក Jens Stoltenberg បាននិយាយថា សម្ព័ន្ធមិត្តយោធា លោកខាងលិច នឹងអនុវត្តការ ដាក់ពង្រាយកងទ័ពថ្មី នៅជិតព្រំដែនរបស់រុស្ស៊ី ប្រសិនបើប្រទេស ស៊ុយអែត ស្នើសុំឱ្យចូលរួម សូម្បីតែមុនពេល ដែលខ្លួនត្រូវបានទទួលយកជាផ្លូវការ នៅក្នុងប្លុកក៏ដោយ។
យោងតាមសារព័ត៌មាន RT ចេញផ្សាយនៅថ្ងៃទី៦ ខែឧសភា ឆ្នាំ២០២២ បានឱ្យដឹងថា ថ្លែងទៅកាន់ប្រព័ន្ធផ្សព្វផ្សាយ សាធារណៈ SVT របស់ប្រទេសស៊ុយអែត អំពីកម្មវិធីសមាជិកភាព អនាគតរបស់ទីក្រុង Stockholm ស៊ុយអែត កាលពីថ្ងៃព្រហស្បតិ៍ លោក Stoltenberg បាននិយាយថា អង្គការណាតូអាចលោត ចូលទៅក្នុងសកម្មភាពភ្លាមៗ ដើម្បីពង្រឹងការការពារ របស់ប្រទេសក្នុងអំឡុងពេលដំណើរការ ដែលអាចចំណាយពេល ដល់ទៅមួយឆ្នាំដើម្បីបញ្ចប់ ។
លោកបានមានប្រសាសន៍ថា “ចាប់ពីពេលដែលស៊ុយអែត បានដាក់សំណើ ហើយអង្គការណាតូនិយាយថា ពួកគេចង់ឱ្យស៊ុយអែតចូលរួម មានកាតព្វកិច្ចយ៉ាងខ្លាំងពីណាតូ ដើម្បីអាចធានាសន្តិសុខស៊ុយអែតបាន”។ “យើងមានវិធីផ្សេងគ្នា ក្នុងការធ្វើវា រួមទាំងតាមរយៈការកើនឡើង នៃកងកម្លាំងណាតូនៅក្នុងតំបន់ជុំវិញប្រទេសស៊ុយអែត និងសមុទ្របាល់ទិក» ។
ការអត្ថាធិប្បាយនេះ ធ្វើឡើងបន្ទាប់ពីមានការពិភាក្សា ជាសាធារណៈជាច្រើនសប្តាហ៍ ដែលផ្តោតលើការចូលរួម ដ៏មានសក្តានុពលរបស់ទីក្រុង Stockholm ទៅក្នុងអង្គការណាតូ ក៏ដូចជាប្រទេស ជិតខាង របស់ហ្វាំងឡង់ផងដែរ ។ ទោះបីជាប្រទេសទាំងពីរ បានរក្សាអព្យាក្រឹតភាព ពេញមួយអត្ថិភាព នៃប្លុកយោធាក៏ដោយ ក៏ក្រុមមន្ត្រីបានអះអាងថា ការវាយប្រហាររបស់ទីក្រុង មូស្គូលើអ៊ុយក្រែន កាលពីចុងខែកុម្ភៈ បានផ្លាស់ប្តូរការគិតរបស់ស៊ុយអែត និងហ្វាំងឡាំងយ៉ាងខ្លាំង ទៅលើសន្តិសុខក្នុងតំបន់ ៕
ប្រែសម្រួលៈ ណៃ តុលា
