គៀវ៖ ទីភ្នាក់ងារព័ត៌មានចិនស៊ិនហួ បានចុះផ្សាយនៅថ្ងៃទី២១ ខែឧសភា ឆ្នាំ២០២២ថា ក្រសួងហិរញ្ញវត្ថុអ៊ុយក្រែន បានឲ្យដឹងកាលពីថ្ងៃសុក្រថា ប្រទេសអ៊ុយក្រែន បានទទួលជំនួយលើកទី២ចំនួន៦០០លានអឺរ៉ូ ស្មើនឹងប្រមាណ៦៣៤លានដុល្លារអាមេរិក នៃកម្មវិធីជំនួយ ម៉ាក្រូហិរញ្ញវត្ថុ បន្ទាន់របស់សហភាព អឺរ៉ុប ហៅកាត់ (EU) ។
ក្រសួងបានឲ្យដឹង នៅក្នុង សេចក្តីថ្លែងការណ៍មួយថា “មូលនិធិនឹងត្រូវបានប្រើ ដើម្បីរក្សាស្ថិរភាពហិរញ្ញវត្ថុ នៅក្នុងប្រទេសអ៊ុយក្រែន ក្នុងអំឡុងពេលសង្រ្គាម” ។
លោក Denys Shmyhal នាយករដ្ឋមន្ត្រីអ៊ុយក្រែន បានស្វាគមន៍ជំនួយនេះ ហើយបានថ្លែងអំណរគុណ ដល់ប្រធានគណៈកម្មការអឺរ៉ុប Ursula von der Leyen សម្រាប់ជំនួយនេះ ។
សហភាពអឺរ៉ុប បានសម្រេចចិត្តបែងចែកប្រាក់១,២ពាន់លានអឺរ៉ូ ស្មើនឹង១,២៦ពាន់លានដុល្លារ ជាជំនួយសង្គ្រោះបន្ទាន់ សម្រាប់អ៊ុយក្រែនក្នុងខែកុម្ភៈ ហើយអ៊ុយក្រែន បានទទួលប្រាក់៦០០លានអឺរ៉ូពីកញ្ចប់ ជំនួយកាលពីខែមីនា ៕ប្រែសម្រួលដោយ៖ ម៉ៅ បុប្ផាមករា
