មេដឹកនាំតួកគី និងបារាំង ជួបពិភាក្សាគ្នា ស្ដីពីវិបត្ដិនៅអ៊ុយក្រែន និងការពង្រីករបស់ណាតូ

អង់ការ៉ា៖ ប្រធានាធិបតីតួកគីលោក Recep Tayyip Erdogan និងសមភាគីបារាំងលោក Emmanuel Macron កាលពីថ្ងៃព្រហស្បតិ៍បានពិភាក្សាគ្នាតាមទូរស័ព្ទ ដើម្បីពិភាក្សាអំពីវិបត្តិអ៊ុយក្រែន ទស្សនវិស័យនៃការពង្រីករបស់អង្គការណាតូ និងទំនាក់ទំនងទ្វេភាគី។

ប្រធានាធិបតីតួកគីបានឲ្យដឹងនៅក្នុងសេចក្តីថ្លែងការណ៍មួយថា លោក Erdogan បានប្រាប់លោក Macron ថាតួកគីចង់បាន “សន្តិភាព” រវាងរុស្ស៊ី និងអ៊ុយក្រែន ឱ្យបានឆាប់តាមដែលអាចធ្វើទៅបាន ហើយបន្តលើកទឹកចិត្តឱ្យភាគីទាំងពីរធ្វើកិច្ចសន្ទនា និងការទូត។

សេចក្តីថ្លែងការណ៍បានឲ្យដឹងថា ពាក់ព័ន្ធនឹងការដេញថ្លៃរបស់ប្រទេសហ្វាំងឡង់ និងស៊ុយអែត ដើម្បីចូលរួមជាមួយអង្គការណាតូ លោក Erdogan បានលើកឡើងថា “ទំនាក់ទំនងនៃប្រទេសទាំងនេះជាមួយបុគ្គល និងស្ថាប័នពាក់ព័ន្ធរបស់គណបក្ស Kurdistan Workers’ Party (PKK) ដែលមិនស្របច្បាប់ មិនស្របតាមស្មារតីនៃសម្ព័ន្ធភាពនោះទេ”។

ប្រទេសស៊ុយអែត និងហ្វាំងឡង់ បានបញ្ជូនគណៈប្រតិភូទៅទីក្រុងអង់ការ៉ា សម្រាប់កិច្ចពិភាក្សាកាលពីថ្ងៃពុធ ក្នុងកិច្ចខិតខំប្រឹងប្រែងដើម្បីដោះស្រាយភាពខុសគ្នារបស់ពួកគេជាមួយប្រទេសតួកគី ដែលគំរាមរារាំងការចូលជាសមាជិករបស់អង្គការណាតូ។

អ្នកនាំពាក្យប្រធានាធិបតីតួកគី លោក Ibrahim Kalin បានឲ្យដឹងបន្ទាប់ពីកិច្ចពិភាក្សានេះថា ប្រទេសតួកគីបានបង្ហាញការទាមទាររបស់ខ្លួនទៅកាន់គណៈប្រតិភូ សម្រាប់ប្រទេស Nordic ទាំងពីរ ដើម្បីចាត់វិធានការជាក់ស្តែង ដើម្បីដោះស្រាយជាមួយនឹងកង្វល់សន្តិសុខរបស់ប្រទេសតួកគី៕ប្រែសម្រួល ឈូក បូរ៉ា