ភ្នំពេញ ៖ មហាជនភ្ញាក់ផ្អើលយ៉ាងខ្លាំង បន្ទាប់ពីបានដឹងដំណឹងថា តារាសម្តែងជើងចាស់ លោកគន្ធ តារាវណ្ណ ពេលនេះកំពុងធ្លាក់ខ្លួនមានជំងឺធ្ងន់ធ្ងរ និងកំពុងសង្គ្រោះនៅក្នុងមន្ទីរពេទ្យក្នុងស្រុកមួយកន្លែង ។
យោងតាមគណនីហ្វេសប៊ុករបស់លោក លោក គន្ធ ជីវ័ន្ត ដែលជាកូនប្រុសបង្កើតរបស់តារាសម្ដែងជើងចាស់ខាងលើ បានឱ្យដឹងថា ខណៈពេលនេះស្ថានភាពជំងឺឪពុករបស់លោកកំពុងស្ថិតក្នុងស្ថានភាពធ្ងន់ធ្ងរ ។
លោក គន្ធ ជីវ័ន្ត បានប្រើគណនីហ្វេសប៊ុកឈ្មោះ Kun Chivon សរសេររៀបរាប់យ៉ាងដូច្នេះថា «សូមទេវតាវត្ថុស័ក្តសិទ្ធិជួយអោយលោកឪពុកខ្ញុំឆាប់ជាសះស្បើយពីជំងឺ និងរឹងមាំឡើងវិញ គាត់កំពុងស្ថិតក្នុងស្ថានភាពធ្ងន់ធ្ងរ ប្រឡូកក្នុងវិស័យសិល្បះភាពយន្តតាំងពីឆ្នាំ១៩៨៦ គាត់ឈ្មោះ គន្ធ តារាវណ្ណ »។ យ៉ាងណាក៏ដោយលោកពុំបានបញ្ជាក់ថាលោក គន្ធ តារាវណ្ណ មានជំងឺនោះទេ ប៉ុន្តែបើយោងតាមគណនីហ្វេសប៊ុកឈ្មោះ Bunny Chhoun ដែលជាអ្នកជិតដិតនឹងលោក គន្ធ តារាវណ្ណ បានឆ្លើយតបនៅក្នុងប្រអប់បញ្ចេញមតិថា លោក គន្ធ តារាវណ្ណមានជំងឺ លើសឈាម ស្ទះទឹកប្រម៉ាត់ និងប៉ោងសសៃឈាម ស្ថិតក្នុងសភាពធ្ងន់។
គួរឱ្យដឹងផងដែរថា លោក គន្ធ តារាវណ្ណ ជាតារាសម្ដែងជើងចាស់មួយរូប ជំនាន់លោកគង់ សុភី លោកចៅ ចាន់ណារី លោកយស បូវណ្ណៈ អ្នកនាងអម្ពរ ទេវី អ្នកនាងចាន់ តារាទី លោកខៃ ប្រសិដ្ឋ អ្នកនាង សុខ ស្រីមុំ និងអ្នកនាងពិសិដ្ឋ ពិលិកា ជាដើម ។ លោកបានចាប់ផ្ដើមចូលប្រឡូកក្នុងពិភពសិល្បៈសំដែងតាំងពីឆ្នាំ១៩៨៦ នៅវ័យ ៥៣ឆ្នាំ និងបានចូលរួមសម្ដែងក្នុងខ្សែភាពយន្ដរឿងសម័យ និងបុរាណប្រហែលជា១៧០រឿង ។
ក្រៅតែពីអាជីពជាតារាសម្ដែងហើយនោះ តារាជើងចាស់ដែលស៊ីជាមួយតួអង្គអ្នកមាន និងតួអង្គស្ដេចហើយនោះ លោកក៏មានការងារក្នុងជួរមន្ត្រីរាជការ ជាមន្ដ្រីយោធាថ្នាក់ឧត្ដមសេនីយ៍ទោ ផ្កាយពីរផងដែរ ៕ដោយ៖ ម៉ានី
