បរទេស៖ ឯកអគ្គរដ្ឋទូតរុស្ស៊ីប្រចាំ នៅសហរដ្ឋអាមេរិក លោក Anatoly Antonov បាននិយាយកាលពីថ្ងៃពុធថា សហរដ្ឋអាមេរិកកំពុងបំពាន លើកាតព្វកិច្ចអន្តរជាតិ និងគោលនយោបាយផ្ទាល់ខ្លួនរបស់ខ្លួន ជាមួយនឹងកញ្ចប់ជំនួយយោធា ចុងក្រោយបំផុតរបស់ខ្លួនចំពោះអ៊ុយក្រែន។
លោកបានចង្អុលបង្ហាញថា ក្នុងចំណោមរបស់ផ្សេងទៀត គឺរដ្ឋាភិបាលទីក្រុងវ៉ាស៊ីនតោន បានបរាជ័យក្នុងការទទួលបាន ការអនុញ្ញាតពីរុស្ស៊ី មុនពេលបង្វែរឧទ្ធម្ភាគចក្រ Mi-17 ចំនួនបួនគ្រឿងពីគោលដៅដើម នៅប្រទេសអាហ្វហ្គានីស្ថាន ទៅកាន់អ៊ុយក្រែន។
លោក Anatoly Antonov បាននិយាយថា វាជាការខឹងសម្បារដែលអ៊ុយក្រែន បានទទួលឧទ្ធម្ភាគចក្រដែលរុស្ស៊ី លក់ឱ្យសហរដ្ឋអាមេរិក ជាជំនួយសម្រាប់អាហ្វហ្គានីស្ថាន។
យោងតាមសារព័ត៌មាន RT ចេញផ្សាយនៅថ្ងៃទី8 ខែមិថុនា ឆ្នាំ2022 បានឱ្យដឹងថា អ្នកការទូតរបស់រុស្ស៊ីរូបនេះ បានឆ្លើយតបទៅនឹងការប្រកាស កាលពីសប្តាហ៍មុនដោយ ក្រសួងការពារជាតិសហរដ្ឋអាមេរិក ដែលបានចុះបញ្ជីយន្តហោះ ដែលគ្រោងនឹងប្រគល់ឱ្យអ៊ុយក្រែន។ ឧទ្ធម្ភាគចក្រ Mi-17 ចំនួន 4 គ្រឿង ត្រូវបានគេសន្មត់ថា ជាយន្តហោះដែលអាមេរិកទិញ សម្រាប់កងទ័ពជាតិអាហ្វហ្គានីស្ថាន មុនពេលរដ្ឋាភិបាលដែលគាំទ្រ ដោយសហរដ្ឋអាមេរិកនៅទីក្រុងកាប៊ុល បានបរាជ័យហើយបានធ្លាក់ទៅលើ កងកម្លាំងតាលីបង់ក្នុងខែសីហាឆ្នាំមុន ។
ឯកអគ្គរដ្ឋទូតរុស្ស៊ីបាននិយាយថា ការផ្ទេរឧទ្ធម្ភាគចក្រ “ត្រូវបានធ្វើឡើងដោយបំពានលើ វិញ្ញាបនបត្រអ្នកប្រើប្រាស់ចុងក្រោយ ដែលទាមទារការយល់ព្រម ជាលាយលក្ខណ៍អក្សរពីប្រទេសរុស្ស៊ី”។ លោកបានហៅវាថាជា “ការបំពានយ៉ាងម៉ឺងម៉ាត់” នៃកាតព្វកិច្ចរបស់អាមេរិក ក្នុងនាមជាអ្នកទិញ ហើយបានអះអាងថា ទីក្រុងវ៉ាស៊ីនតោនបានបិទការទាមទារ របស់រុស្ស៊ីសម្រាប់ការពន្យល់ លើហេតុផលនេះថែមទៀត ៕
ប្រែសម្រួលៈ ណៃ តុលា
