បរទេស ៖ អគ្គលេខាធិការសម្ព័ន្ធភាពយោធាណាតូ គឺលោក Jens Stoltenberg បាននិយាយ កាលពីថ្ងៃចន្ទថា អង្គការណាតូ មិនមានហេតុផលដើម្បីជឿថា នឹងមានបញ្ហាណាមួយ ជាមួយនឹងពាក្យសុំចូលជាសមាជិក របស់ប្រទេសស៊ុយអែត និងហ្វាំងឡង់នោះទេ ។ លោក Jens Stoltenberg បានទទួលស្គាល់ថា លោកបានបិទភ្នែក ដោយការព្រួយបារម្ភរបស់តួកគី គឺ “ស្របច្បាប់” ។ លោកនៅតែចង់ឱ្យរដ្ឋាភិបាល ទីក្រុង Stockholm និង Helsinki ចូលរួមឱ្យបានឆាប់ តាមដែលអាចធ្វើទៅបាន ។
យោងតាមសារព័ត៌មាន RT ចេញផ្សាយនៅថ្ងៃទី១៣ ខែមិថុនា ឆ្នាំ២០២២ បានឱ្យដឹងថា លោក Stoltenberg បានប្រាប់កាសែត Financial Times កាលពីថ្ងៃច័ន្ទថា “មុនដំណើរការនេះ យើងមិនមានហេតុផលដើម្បីជឿថា នឹងមាន បញ្ហាអ្វីនោះទេ” ។ កាលពីខែមេសា អង្គការណាតូ បានសន្យាជាមួយស៊ុយអែត និង ហ្វាំងឡង់ថា ដំណាក់កាលដំបូង នៃ ការចូលជាសមាជិក របស់ពួកគេនឹងចំណាយពេលត្រឹមតែពីរបី សប្តាហ៍ប៉ុណ្ណោះ ហើយមានតែការជំទាស់ របស់តួកគីប៉ុណ្ណោះ ខណៈដែលទីក្រុងអង់ការ៉ា បានចោទប្រកាន់ប្រទេសទាំងពីរថា បានគាំទ្រអំពើភេរវកម្ម។
លោក Stoltenberg បានបន្ថែមថា “ការព្រួយបារម្ភ របស់តួកគីមិនមែនជារឿងថ្មីទេ” ដោយហៅតួកគីថាជា “សម្ព័ន្ធមិត្តដ៏សំខាន់ ហើយនៅពេល ដែលសម្ព័ន្ធមិត្តលើកឡើង ពីកង្វល់ផ្នែកសន្តិសុខ យើងត្រូវដោះស្រាយពួកគេ”៕
ប្រែសម្រួលៈ ណៃ តុលា
