បរទេស៖ ប្រទេសអ៊ុយក្រែនបាន ផ្តាច់ទំនាក់ទំនងការទូត និងសេដ្ឋកិច្ចទាំងអស់ ជាមួយប្រទេសកូរ៉េខាងជើង បន្ទាប់ពីទីក្រុងព្យុងយ៉ាងបានទទួលស្គាល់ ឯករាជ្យភាពនៃសាធារណរដ្ឋ Donbass ទាំងពីរ។
យោងតាមសារព័ត៌មាន RT ចេញផ្សាយនៅថ្ងៃទី១៤ ខែកក្កដា ឆ្នាំ២០២២ បានឱ្យដឹងថា ក្រសួងការបរទេសអ៊ុយក្រែន បាននិយាយនៅក្នុងសេចក្តីថ្លែងការណ៍ មួយកាលពីថ្ងៃពុធថា “យើងចាត់ទុកការសម្រេចចិត្តនេះថា ជាការប៉ុនប៉ងរបស់ទីក្រុងព្យុងយ៉ាង ដើម្បីធ្វើឱ្យខូចដល់អធិបតេយ្យភាព និងបូរណភាពទឹកដីរបស់អ៊ុយក្រែន” ។
ក្រសួងបានបន្តថា “ការទទួលស្គាល់របស់របបកូរ៉េខាងជើងចំពោះ “កម្មវត្ថុ” នៃរបបការងាររបស់រុស្ស៊ីនៅក្នុងតំបន់ Donetsk និង Luhansk គឺទុកជាមោឃៈ នឹងមិនមានអំណាចផ្នែកច្បាប់ ហើយនឹងមិនផ្លាស់ប្តូរព្រំដែន ដែលទទួលស្គាល់ជា អន្តរជាតិរបស់អ៊ុយក្រែនទេ”។
សេចក្តីថ្លែងការណ៍នេះ បានធ្វើឡើងបន្ទាប់ពីទីក្រុងព្យុងយ៉ាង បានបញ្ជាក់កាលពីថ្ងៃពុធថា ខ្លួនបានទទួលស្គាល់ជាផ្លូវការ នូវឯករាជ្យភាពនៃសាធារណរដ្ឋ Donetsk និង Lugansk ដែលបានផ្តាច់ខ្លួនចេញពី អ៊ុយក្រែនភ្លាមៗបន្ទាប់ពីរដ្ឋប្រហារឆ្នាំ ២០១៤ នៅទីក្រុងគៀវ។ រុស្ស៊ីបានទទួលស្គាល់ឯករាជ្យរបស់ Donetsk និង Lugansk នៅចុងខែកុម្ភៈ ហើយស៊ីរីបានធ្វើតាមកាលពីខែមុន ៕
ប្រែសម្រួលៈ ណៃ តុលា
