ភ្នំពេញ ៖ សម្ដេចតេជោ ហ៊ុន សែន នាយករដ្ឋមន្រ្តីនៃកម្ពុជាបានចេញមកបញ្ជាក់ និងអះអាងយ៉ាងច្បាស់ៗថា ក្នុងក្រុមគ្រួសារ របស់សម្ដេច គ្មានជម្លោះ ក្នុងការដណ្ដើមគ្នាធ្វើជាបេក្ខភាពនាយករដ្ឋមន្រ្តី ទៅថ្ងៃអនាគតរវាង លោក ហ៊ុន ម៉ាណែត និងលោក ម៉ានី ដូចការលើកឡើងរបស់ក្រុមអ្នកវិភាគអគតិ មួយចំនួននោះទេ។
ការចេញមុខបញ្ជាក់ច្បាស់ៗ ពីសំណាក់សម្ដេចតេជោ ហ៊ុន សែន បែបនេះ ធ្វើឡើងបន្ទាប់ពីមានការចុះផ្សាយរបស់សារព័ត៌មាន «The Cambodia Dialy Khmer»ថា លោក ហ៊ុន ម៉ាណែត និង ហ៊ុន ម៉ានី បាននិងកំពុងដណ្តើមយកប្រជាប្រិយភាពគ្នា ក្នុងការប្រជែងធ្វើជានាយករដ្ឋមន្រ្តីកម្ពុជា នាពេលអនាគត ។
ឱកាសអញ្ជើញជាអធិបតី បើកការដ្ឋានសាងសង់ ស្ពានអាកាសចំនួន២កន្លែងបន្ថែមទៀត ក្នុងរាជធានីភ្នំពេញ សម្ដេចតេជោមានប្រសាសន៍ថា ពីមុនគេវិភាគត្រឹមតែផ្ទៃក្នុងគណបក្សប្រជាជនកម្ពុជា តែឥឡូវគេវិភាគថា ហ៊ុន ម៉ាណែត និង ហ៊ុន ម៉ានី ដណ្ដើមគ្នាធ្វើនាយករដ្ឋមន្រ្តី ជម្លោះធ្ងន់ធ្ងរក្នុងគ្រួសារតម្រូវឲ្យសម្ដេចក្នុងនាមជាឪពុក ចេញមកសម្រុះសម្រួល។
ត្រង់ចំណុចនេះ សម្ដេចតេជោ ហ៊ុន សែន គូសបញ្ជាក់ថា «មិនចាំបាច់សម្រុះសម្រួលទេ កូនរបស់ខ្ញុំ គេស្គាល់គ្នាណាស់ ហើយគេគោរពបងគេណាស់ »។
សម្ដេចបញ្ជាក់បន្ថែមថា «ខ្ញុំកំរិតត្រឹមកូននិងចៅរបស់ខ្ញុំទៅចុះ! បងប្អូនគេ គេមានឋានានុក្រមរបស់គេ គេស្ដាប់បងរបស់គេដែរ គេគ្មានមហិច្ចតា ដណ្ដើមបងរបស់គេ ធ្វើជានាយករដ្ឋមន្រ្តីនោះទេ»។
ជាមួយគ្នានេះ សម្ដេចក៏បានផ្ដាំត្រឡប់ទៅកាន់ ក្រុមប្រឆាំងវិញថា បើល្អត្រូវចេះគ្រប់គ្រងគ្រួសាររបស់ខ្លួនឲ្យល្អទៅ ដោយកុំយកបញ្ហាគ្រួសារគេ មកសន្និដ្ឋាន។
សម្ដេចគូសបញ្ជាក់ទៀតថា «បើខ្លួនឯងមិនកើត កុំគិតថាគេមិនកើតដូចខ្លួន»៕
