ភ្នំពេញ ៖ លោក ស សុខា កូនប្រុសរបស់សម្តេច ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ និងជាអនុប្រធានគណបក្សប្រជាជនកម្ពុជា បច្ចុប្បន្នកំពុងកាន់តួនាទី ជារដ្ឋលេខាធិការក្រសួងអប់រំ យុវជន និងកីឡា និងតំណាងរាស្រ្តមណ្ឌលព្រៃវែង បានចេញមកបកស្រាយ ក៏ដូចជាការច្រានចោល ជុំវិញការកាត់តវិដេអូថា លោកកំពុងប្រដៅលោក ហ៊ុន ម៉ាណែត បេក្ខភាពនាយករដ្ឋមន្ត្រីនាថ្ងៃអនាគត និងលោក ហ៊ុន ម៉ានី ព្រមទាំងចោទប្រកាន់រូបលោកថា ចង់ធ្វើជានាយករដ្ឋមន្ត្រីនោះ គឺជារឿងមិនពិតទេ ។
ដោយលោកបញ្ជាក់យ៉ាងច្បាស់លាស់ថា “ខ្ញុំកើតមកមិនមែនដើម្បីប្រកួតប្រជែងនោះទេ។ ជាការពិតខ្ញុំនៅក្នុងគណបក្សមួយ។ យើងត្រូវគោរពសេចក្ដីសម្រេច របស់គណបក្សក្នុងការរៀបចំចាត់ចែង រចនាសម្ព័ន្ធដឹកនាំប្រទេស” ។
ការចេញមុខបកស្រាយភ្លាមៗ របស់លោក ស សុខា នៅពេលនេះ ធ្វើឡើងបន្ទាប់ពីមានវិដេអូ ដែលត្រូវបានកាត់បញ្ចូល និងប្រើប្រាស់ចំណងជើង ក្នុងន័យអុចអាល ញុះញុង រវាងលោក សុ សុខា និងលោក ហ៊ុន ម៉ាណែត កូនប្រុសសម្តេចតេជោ នាយករដ្ឋមន្ត្រីនៃកម្ពុជា អំពីការប្រជែងគ្នាចង់ធ្វើជា នាយករដ្ឋមន្រ្តីនាពេលអនាគត នៅលើបណ្តាញសង្គមផ្សេងៗ យ៉ាងផុសផុល ។
យោងតាមសំណេររបស់លោក ស សុខា បានរៀបរាប់នៅព្រឹកថ្ងៃទី៩ ខែកញ្ញា ឆ្នាំ២០២២នេះ បានឲ្យដឹងថា “ខ្ញុំមិនទោមនស្សរាល់ការបញ្ចេញមតិ របស់លោកនោះទេ(ម្ចាស់ផេកម្នាក់)។ ប៉ុន្តែខ្ញុំសុំលោកម្យ៉ាង កុំយកវិឌីអូឃ្លីបរបស់ខ្ញុំ ដែលមានខ្លឹមសារផ្សេងទៅបង្ហោះ ដាក់ចំណងជើងផ្សឹង ដែលបង្កប់ដោយចេតនាញុះញុង ឬចោទប្រកាន់ខ្ញុំថា បង្គាប់បញ្ជាប្រដែលប្រដៅ បុគ្គលនេះបុគ្គលនោះ ជាពិសេសកូនសម្ដេចតេជោ នាយករដ្ឋមន្រ្តី ដូចជា ឯកឧត្តម ហ៊ុន ម៉ាណែត និងឯកឧត្ដម ហ៊ុន ម៉ានី ជាដើម”។
សំណេររបស់លោក ស សុខា បន្ថែមទៀតថា ” អ្វីដែលខ្ញុំមិនអាចទទួលយកបាន លោកថា ខ្ញុំក៏ចង់ធ្វើជានាយករដ្ឋមន្រ្តីដែរនោះ។ ខ្ញុំសូមបញ្ជាក់ថា ខ្ញុំកើតមកមិនមែន ដើម្បីប្រកួតប្រជែងនោះទេ។ ជាការពិតខ្ញុំនៅក្នុងគណបក្សមួយ។ យើងត្រូវគោរពសេចក្ដីសម្រេច របស់គណបក្ស ក្នុងការរៀបចំចាត់ចែង រចនាសម្ព័ន្ធដឹកនាំប្រទេស នៅពេលដែលគណបក្សឈ្នះឆ្នោត។ ជាក់ស្ដែង ឯកឧត្តមហ៊ុន ម៉ាណែត ត្រូវបានគណបក្សបោះឆ្នោត ជាបេក្ខជនបន្តវេននាពេលអនាគត ដែលក្នុងនោះ ខ្ញុំក៏ជាមនុស្សម្នាក់គាំទ្រលោកដែរ”។
លោកព្រមទាំង បានបង្ហាញនូវសារមួយទៅដល់ អ្នកដែលកំពុងអុចអាលចោទប្រកាន់ លោកទៀតថា “ថាជាភ័ព្វសំណាងរបស់ខ្ញុំក៏ថា បានដែលកើតមកក្នុងត្រកូលខ្ពង់ខ្ពស់មួយ។ តែអ្វីដែលជាស្មារតីពិតប្រាកដរបស់ខ្ញុំ មិនមែនកើតមក សម្រាប់ជាការប្រកួតប្រជែងនោះទេ តែជាការចូលរួមចំណែកឲ្យអស់ពីលទ្ធភាព ដើម្បីប្រយោជន៍យុវជន ប្រជាជន និងសង្គមជាតិទាំងមូល។ ពោលគឺខ្ញុំមិនធ្វើជាចំណែកនៃបញ្ហានោះទេ តែខ្ញុំប្ដេជ្ញាធ្វើជាចំណែក នៃដំណោះស្រាយសង្គមវិញ។
ចំពោះការចោទប្រកាន់ខាងលើនេះ លោក ស សុខា បញ្ជាក់ថា ជាយុទ្ធសាស្ត្របំបែកបំបាក់ផ្ទៃក្នុង ដែលពុំធ្លាប់មានប្រសិទ្ធភាពម្ដងណាឡើយ ហើយលោកថា ខ្លួនមិនអាចទទួលយកបានទេ និងជារឿងអយុត្តិធម៌៕
