ភ្នំពេញ៖ សម្ដេចតេជោ ហ៊ុន សែន នាយករដ្ឋមន្ដ្រី កម្ពុជា នឹងពិចារណាដាក់ក្នុងធម្មនុញ្ញ តម្រូវឱ្យមន្ដ្រីរាជការ កងកម្លាំងប្រដាប់អាវុធ និងអ្នកធ្វើនយោបាយ ត្រូវមានសញ្ជាតិតែមួយ។
សម្ដេចតេជោ លើកឡើងបែបនេះ បន្ទាប់ពីមិត្តភិក្តបរទេសមួយចំនួន បានលើកយកបញ្ហាសញ្ជាតិមកនិយាយ ចំពោះការអនុវត្តទោសអ្នកនយោបាយនៅកម្ពុជា។
ក្នុងពិធីបើកការដ្ឋានសាងសង់ពង្រីក និងលើកកម្រិតគុណភាព កំណាត់ផ្លូវជាតិលេខ ៧ នាព្រឹកថ្ងៃទី៩ ខែមករា ឆ្នាំ២០២២ សម្ដេចតេជោ បានផ្ដាំផ្ញើដល់មិត្តភិក្តបរទេសទាំងឡាយ នៅពេលប្រជាពលរដ្ឋខ្មែរ ធ្វើនយោបាយនៅកម្ពុជា គឺប្រជាពលរដ្ឋកម្ពុជាហើយ។
ដូច្នេះសម្ដេចតេជោបញ្ជាក់ថា «ខ្ញុំសូមផ្ដាំទៅមិត្តភក្ដិបរទេសទាំងឡាយ ខ្ញុំបានប្រាប់អគ្គរដ្ឋទូតមួយ ដោយ សារតែគេចូលចិត្តនិយាយថា អ្នកនេះ មានសញ្ជាតិនេះ អ្នកនេះមានសញ្ជាតិនោះ ត្រូវទទួលការប្ដឹងផ្ដល់ ឬក៏ជាប់ឃុំឃាំង។ ខ្ញុំបាននិយាយទៅកាន់វិញថា បើយ៉ាងដូច្នេះ ខ្ញុំក៏ត្រូវគិតដែរ អំពីរដ្ឋធម្មនុញ្ញកម្ពុជា កំណត់ឱ្យមានសញ្ជាតិតែមួយតែម្ដង កុំឱ្យវាពិបាក»។
សម្ដេចតេជោ បន្ដថា ការអនុវត្តច្បាប់ទៅលើបុគ្គលមួយចំនួន ជាអ្នកនយោបាយ ត្រូវបានមិត្តភិក្តបរទេសមួយចំនួន និយាយថា «បុគ្គលនោះ មានសញ្ជាតិនេះ ឬមានសញ្ជាតិនោះ»។ សម្ដេច តបវិញថា អ្នកធ្វើការងារនៅកម្ពុជា គឺពលរដ្ឋកម្ពុជា មិនអាចឱ្យពលរដ្ឋបរទេស មកធ្វើនយោបាយនៅស្រុកខ្មែរឡើយ។
សម្ដេចតេជោ បញ្ជាក់ទៀតថា «អីចឹងទេ កម្ពុជា នឹងពិចារណាបន្ដទៀត អំពីថា តើដាក់ក្នុងរដ្ឋធម្មនុញ្ញ តម្រូវឱ្យមន្ដ្រីរាជការ កងកម្លាំងប្រដាប់អាវុធ និងអ្នកធ្វើនយោបាយទាំងឡាយ ត្រូវមានសញ្ជាតិតែមួយ ។អាហ្នឹងត្រូវតែគិតដែរ បើមិនចឹងទេ នៅស៊ាំញាំនៅនឹង»។
សម្ដេចតេជោ បានឱ្យដឹងថា កន្លងមក រដ្ឋធម្មនុញ្ញរបស់កម្ពុជា បានកំណត់ឱ្យបុគ្គលតែ១៣រូប ត្រូវមានសញ្ជាតិខ្មែរតែមួយ ក្នុងនោះ សមាសភាពថ្នាក់ដឹកនាំ គ.ជ.ប ទាំង ៩រូប, តំណែងជាប្រធានព្រឹទ្ធសភាមួយរូប, តំណែងជាប្រធានរដ្ឋសភាមួយរូប, តំណែជានាយករដ្ឋមន្ត្រីមួយរូប, និងប្រធានក្រុមប្រឹក្សាធម្មនុញ្ញមួយរូប។
សម្ដេចតេជោបន្ដទៀតថា បើសិននៅតែមានការ លើកឡើងដដែលអំពី បុគ្គលនេះ សញ្ជាតិនេះ ឬសញ្ជាតិនោះ បន្តទៅទៀតនោះ សម្ដេច នឹងពិនិត្យមើលអំពីការ ធ្វើវិសោធនកម្មរដ្ឋធម្មនុញ្ញ ដើម្បីដាក់ចេញនូវការអនុវត្តសញ្ជាតិតែមួយ សម្រាប់អ្នកធ្វើនយោបាយនៅកម្ពុជា ដើម្បីបញ្ចប់ជាស្ថាពរនូវ បញ្ហាសញ្ជាតិនេះផងដែរ៕
