បរទេស៖ អ្នកនាំពាក្យក្រសួងការបរទេសចិន លោក Wang Wenbin បានពន្យល់ថា សមយុទ្ធយោធារបស់ចិននៅជិតកោះតៃវ៉ាន់ ដែលបានចាប់ផ្តើមកាលពីសប្តាហ៍មុន មិនគួរត្រូវបានចាត់ទុកថាជា “ការសងសឹក” សម្រាប់ដំណើរទស្សនកិច្ចរបស់មេដឹកនាំកោះតៃវ៉ាន់ លោកស្រី Tsai Ing-wen ទៅកាន់សហរដ្ឋអាមេរិកនោះទេ។
យោងតាមសារព័ត៌មាន RT ចេញផ្សាយនៅថ្ងៃទី១០ ខែមេសា ឆ្នាំ២០២៣ បានឱ្យដឹងថា លោក Wang ត្រូវបានសួរក្នុងអំឡុងសន្និសីទសង្ខេបប្រចាំថ្ងៃនៅថ្ងៃចន្ទ អំពីសង្គ្រាមនៅច្រកសមុទ្រតៃវ៉ាន់ និងទំនាក់ទំនងដែលអាចកើតមានរបស់ពួកគេជាមួយនឹងការធ្វើដំណើររបស់លោកស្រី Tsai ទៅកាន់ទីក្រុងវ៉ាស៊ីនតោន។ ឆ្លើយតបទៅនឹងការលើកឡើងរបស់អ្នកសារព័ត៌មានបរទេសដែលថា សមយុទ្ធនេះបានបង្កការគំរាមកំហែងដល់កោះចិនដែលគ្រប់គ្រងដោយខ្លួនឯងនោះ អ្នកនាំពាក្យលោក Wang បានចាត់ទុកការអះអាងនេះថា “មិនសមហេតុផល”។ លោកបានអះអាងថា គ្រោះថ្នាក់ពិតប្រាកដចំពោះសន្តិភាពក្នុងតំបន់កើតចេញពី “សកម្មភាពបំបែកខ្លួន” របស់ប្រជាជនដែលគាំទ្រឯករាជ្យភាពរបស់កោះតៃវ៉ាន់ពីទីក្រុងប៉េកាំង។
លោក Wang បានចង្អុលបង្ហាញថា ការបំបែកខ្លួនរបស់កោះតៃវ៉ាន់ គឺប្រឆាំងនឹងគោលនយោបាយចិនតែមួយដែលត្រូវបានគាំទ្រយ៉ាងទូលំទូលាយដោយសហគមន៍អន្តរជាតិ។ លោកបានសង្កត់ធ្ងន់ថា បុព្វហេតុនៃឯករាជ្យភាពរបស់កោះតៃវ៉ាន់គឺមិនស៊ីគ្នានឹងសន្តិភាព និងស្ថិរភាពនៅទូទាំងច្រកសមុទ្រតៃវ៉ាន់ ដូច្នេះត្រូវតែប្រឆាំងដាច់ខាត។
អ្នកនាំពាក្យរូបនេះបានបង្វែរអ្នកសារព័ត៌មានទៅធ្វើការកត់សម្គាល់ អំពីសមយុទ្ធដែលចេញផ្សាយដោយក្រសួងការពារជាតិ។ ទីបញ្ជាការ Eastern Theater នៃកងទ័ពរំដោះប្រជាជនបានពណ៌នាសមយុទ្ធនេះថា ជាការប្រឆាំងនឹង “អំពើឃុបឃិត និងបង្កហេតុរបស់កងកម្លាំងខាងក្រៅ និងកងកម្លាំងបំបែកខ្លួន ‘ឯករាជ្យតៃវ៉ាន់’ ។
សមយុទ្ធនេះត្រូវបានចាប់ផ្តើមកាលពីថ្ងៃសៅរ៍ មួយថ្ងៃបន្ទាប់ពីលោកស្រី Tsai ត្រឡប់មកពីសហរដ្ឋអាមេរិក ជាកន្លែងដែលលោកស្រីបានជួបជាមួយប្រធានសភាលោក Kevin McCarthy និងសមាជិកសភាដទៃទៀត៕ប្រែសម្រួលៈ ណៃ តុលា
