ក្រុងព្យុងយ៉ាង៖ ប្រធានាធិបតី គីម ជុងអ៊ុន ទទួលបានលិខិតដ៏កក់ក្តៅ ពីប្រធានាធិបតីរុស្ស៊ី

បរទេស៖ ទីភ្នាក់ងារសារព័ត៌មានកណ្តាលកូរ៉េ (KCNA) បានផ្សាយនៅថ្ងៃព្រហស្បតិ៍ថា រដ្ឋមន្ត្រីការពារជាតិរបស់រុស្ស៊ី បានបង្ហាញជូនមេដឹកនាំកូរ៉េខាងជើង លោក គីម ជុងអ៊ុន ជាមួយនឹង “សំបុត្រដ៏កក់ក្តៅ” ពីប្រធានាធិបតី វ្ល៉ាឌីមៀ ពូទីន ក្នុងអំឡុងពេលកិច្ចជំនួបនៅទីក្រុងព្យុងយ៉ាង។

យោងតាមសារព័ត៌មាន RT ចេញផ្សាយនៅថ្ងៃទី២៧ ខែកក្កដា ឆ្នាំ២០២៣ បានឱ្យដឹងថា សារព័ត៌មាន KCNA ដែលគ្រប់គ្រងដោយរដ្ឋរបស់កូរ៉េខាងជើង បានផ្សាយថា ខណៈពេលដែលធ្វើជាម្ចាស់ផ្ទះជំនួបជាមួយលោក Sergey Shoigu , លោក គីម ជុងអ៊ុន បានស្នើសុំឱ្យលោក Sergey Shoigu អរគុណដល់លោក ពូទីន សម្រាប់ “លិខិតដ៏កក់ក្តៅ និងល្អរបស់គាត់” ។

ប្រមុខការពារជាតិរុស្ស៊ីបានធ្វើដំណើរដ៏គួរឱ្យភ្ញាក់ផ្អើលមួយទៅកាន់ប្រទេសកូរ៉េខាងជើង ដើម្បីចូលរួមក្នុងខួបលើកទី៧០ នៃការបញ្ចប់សង្គ្រាមកូរ៉េឆ្នាំ ១៩៥០-១៩៥៣ ។ លោក គីម និង លោក Shoigu បានពិភាក្សាគ្នាអំពី “ការអភិវឌ្ឍន៍បន្ថែមទៀតនៃទំនាក់ទំនងជាយុទ្ធសាស្ត្រ និងប្រពៃណីកូរ៉េខាងជើង-រុស្ស៊ី”, នេះបើយោងតាមទីភ្នាក់ងារនេះ។

លោក Shoigu បានទស្សនាការតាំងពិព័រណ៍យោធាដែលរៀបចំឡើងដោយក្រសួងការពារជាតិកូរ៉េខាងជើង ជាកន្លែងដែលគាត់បានឃើញ “អាវុធ និងឧបករណ៍ប្រភេទថ្មី” ដែលផលិតដោយឧស្សាហកម្មអាវុធរបស់ប្រទេស នេះបើយោងតាម KCNA ។

ក្នុងជំនួបជាមួយសមភាគីកូរ៉េខាងជើង លោក Kang Sun-nam , លោក Shoigu បានសាទរចំពោះ “ប្រវត្តិសាស្រ្តដ៏សម្បូរបែបនៃកិច្ចសហប្រតិបត្តិការ” រវាងទីក្រុងមូស្គូ និងទីក្រុងព្យុងយ៉ាង ដោយបន្ថែមថា ការផ្លាស់ប្តូរយោធាជាទៀងទាត់បានជួយ “រក្សាសន្តិភាព និងស្ថិរភាពនៅលើឧបទ្វីបកូរ៉េ”៕ ប្រែសម្រួលៈ ណៃ តុលា