បរទេស៖ ប្រធានសន្តិសុខជាតិ របស់អ៊ីស្រាអែល បាននិយាយនៅក្នុងសុន្ទរកថា តាមទូរទស្សន៍មួយកាលពីថ្ងៃចន្ទ ម្សិលមិញថា អ៊ីស្រាអែលគ្រោងនឹង បើកប្រតិបត្តិការសន្តិសុខប្រឆាំងនឹង សមាជិកនៃក្រុមសកម្មប្រយុទ្ធហាម៉ាស ប៉ាឡេស្ទីន ដែលរស់នៅក្រៅតំបន់ហ្គាហ្សា។
អ៊ីស្រាអែល ក៏នឹងតាមប្រមាញ់ពួកសកម្មប្រយុទ្ធនេះ នៅគ្រប់ទីកន្លែងក្នុងពិភពលោក នេះបើតាមការបញ្ជាក់របស់លោក Bar បាននិយាយនៅក្នុងវីដេអូដែលចាក់ផ្សាយដោយទូរទស្សន៍សាធារណៈរបស់អ៊ីស្រាអែល Kan ។
រដ្ឋាភិបាលអ៊ីស្រាអែលបានប្តេជ្ញាថានឹងផ្តល់ការបរាជ័យចុងក្រោយដល់ក្រុមដែលមានមូលដ្ឋាននៅតំបន់ហ្កាហ្សានេះបន្ទាប់ពីការវាយប្រហារថ្ងៃទី ៧ តុលាដែលបានធ្វើឲ្យជនជាតិអ៊ីស្រាអែលប្រហែល ១២០០នាក់ដែលភាគច្រើនជាជនស៊ីវិលត្រូវបានសម្លាប់នៅក្នុងការវាយប្រហារ ហើយមនុស្សប្រហែល២៤០នាក់ត្រូវបានចាប់ធ្វើជាចំណាប់ខ្មាំង។
គួរឲ្យដឹងដែរថារដ្ឋាភិបាលទីក្រុងយរូសាឡឹមបានឆ្លើយតបជាមួយនឹងយុទ្ធនាការទម្លាក់គ្រាប់បែកដ៏ធំប្រឆាំងនឹងហ្គាហ្សា បន្តដោយប្រតិបត្តិការជើងគោកហើយគិតមកទល់ពេលនេះចំនួនអ្នកស្លាប់ដែលជាប់ពាក់ព័ន្ធនឹងការវាយលុករបស់អ៊ីស្រាអែលលើតំបន់ប៉ាឡេស្ទីនរហូតមកដល់ពេលនេះមានលើសពី១៥៥០០ នាក់មកហើយ៕
ប្រែសម្រួល៖ស៊ុនលី
