មែលប៊ន៖ នាយករដ្ឋមន្ត្រីអូស្ត្រាលី លោក Anthony Albanese បានស្វាគមន៍មេដឹកនាំអាស៊ីអាគ្នេយ៍ នៅទីក្រុងមែលប៊ន សម្រាប់កិច្ចប្រជុំកំពូលពិសេសមួយ ដើម្បីអបអរសាទរខួប ៥០ឆ្នាំ នៃកិច្ចសហប្រតិបត្តិការរបស់ប្រទេសលោក ជាមួយសមាគមប្រជាជាតិអាស៊ីអាគ្នេយ៍ (អាស៊ាន)។
កិច្ចប្រជុំកំពូលពិសេសអាស៊ាន-អូស្ត្រាលីឆ្នាំ២០២៤ ដែលប្រព្រឹត្តទៅនៅទីក្រុងមែលប៊ន ពីថ្ងៃច័ន្ទដល់ថ្ងៃពុធ ដើម្បីប្រារព្ធខួប ៥០ឆ្នាំចាប់តាំងពីអូស្ត្រាលីបានក្លាយជា ដៃគូសន្ទនាដំបូងរបស់អាស៊ាន។
នៅក្នុងសេចក្តីថ្លែងការណ៍ ដែលចេញមុនកិច្ចប្រជុំកំពូលរយៈពេល ៣ថ្ងៃ លោក Albanese បាននិយាយថា កិច្ចប្រជុំនឹងផ្តោតលើការជំរុញការ ចូលរួមផ្នែកសេដ្ឋកិច្ចរវាងប្រទេសអូស្ត្រាលី និងតំបន់ គាំទ្រការផ្លាស់ប្តូរថាមពលស្អាត ការបង្កើនល្បឿនកិច្ចសហប្រតិបត្តិការដែនសមុទ្រ និងការគាំទ្រដល់មេដឹកនាំ ដែលកំពុងរីកចម្រើន។
ក្រៅពីមេដឹកនាំប្រទេសជាសមាជិកអាស៊ាន កិច្ចប្រជុំកំពូលក៏នឹងមានការចូលរួម ពីមេដឹកនាំទីម័រខាងកើតផងដែរ ។ ប្លុកនេះបានយល់ព្រមជាគោលការណ៍ ក្នុងការទទួលស្គាល់ទីម័រខាងកើតជាសមាជិកទី១១ របស់ខ្លួនក្នុងខែវិច្ឆិកា ឆ្នាំ២០២២៕
ប្រែសម្រួល ឈូក បូរ៉ា
