ភ្នំពេញ៖ លោក សេង គន្ធ ត្រូវបានតែងតាំងជាប្រធានគណៈកម្មាធិការ គណបក្សប្រជាជនកម្ពុជា ខណ្ឌមានជ័យ ខណៈលោក សក់ ច័ន្ទកញ្ញារិទ្ធ ជាប្រធានគណៈកម្មាធិការគណបក្សប្រជាជនកម្ពុជា ខណ្ឌពោធិ៍សែនជ័យ ។
ពិធីប្រកាសតែងតាំងនេះ បានធ្វើឡើងនៅថ្ងៃទី៦ ខែមីនា ឆ្នាំ២០២៤ ក្រោមអធិបតីភាព លោក ឃួង ស្រេង សមាជិកគណៈកម្មាធិការកណ្ដាល គណបក្សប្រជាជនកម្ពុជា និងជាប្រធានគណៈកម្មាធិការ គណបក្សប្រជាជនកម្ពុជា រាជធានីភ្នំពេញ នៅមន្ទីរបក្សរាជធានីភ្នំពេញ។
ក្នុងឱកាសនេះលោក ឃួង ស្រេង បានអរគុណចំពោះសមាជិក សមាជិកាគណបក្សប្រជាជនកម្ពុជាទាំងអស់ ដែលបានលះបង់ អស់កម្លាំងកាយចិត្ត ដើម្បីគណបក្សប្រជាជនកម្ពុជា និងបានបោះឆ្នោត ជូនគណបក្សប្រជាជនកម្ពុជា ដែលធ្វើឲ្យគណបក្សប្រជាជនកម្ពុជា ទទួលបានជ័យជំនះ ក្នុងការដឹកនាំប្រទេសជាតិ រហូតមកដល់ពេលនេះ។
លោក ឃួង ស្រេង បានស្នើឱ្យប្រធានគណៈកម្មការគណបក្សប្រជាជនកម្ពុជា ខណ្ឌទាំង២ បន្តយកចិត្តទុកដាក់ ថែរក្សាសន្តិសុខ សណ្តាប់ធ្នាប់សាធារណៈ ពិសេសធ្វើយ៉ាងណាឲ្យភូមិ សង្កាត់មានសុវត្ថិភាព។ បន្តរឹតបន្តឹងច្បាប់ចរាចរណ៍ បង្រ្កាបគ្រឿងញៀន និងល្បែងស៊ីសងខុសច្បាប់គ្រប់ប្រភេទ ទៅតាមអនុសាសន៍ណែនាំ របស់សម្ដេចធិបតីហ៊ុន ម៉ាណែត នាយករដ្ឋមន្ត្រី ។
លោក ឃួង ស្រេង ក៏បានជំរុញគណបក្សខណ្ឌ សង្កាត់ត្រូវ ផ្ដល់សេវា ជូនប្រជាពលរដ្ឋឲ្យបានលឿននិងមានតម្លាភាព ដើម្បីអោយប្រជាពលរដ្ឋ គោរពស្រលាញ់ ហើយបោះឆ្នោតជូនគណបក្សប្រជាជនកម្ពុជា ដើម្បីឲ្យគណបក្សប្រជាជនកម្ពុជា មានឱកាសអភិវឌ្ឍន៍ប្រទេស សម្រេចបាន នូវចក្ខុវិយ ក្លាយជាប្រទេសដែលមានចំណូលមធ្យមកម្រិតខ្ពស់នៅឆ្នាំ ២០៣០ និងក្លាយជាប្រទេសមានចំណូលខ្ពស់ នៅឆ្នាំ ២០៥០។
ជាមួយគ្នានេះ ប្រធានគណៈកម្មាធិការគណបក្សប្រជាជនកម្ពុជា ទាំងពីរខាងលេី បានប្ដេជ្ញាចិត្តគាំទ្រ សម្ដេចតេជោ ហ៊ុន សែន ជាប្រធានគណបក្សប្រជាជនកម្ពុជារហូត ។ ប្តេជ្ញា ចិត្តគោរពច្បាប់ បំពេញការងារឲ្យបានល្អឆ្លើយតបទៅនឹងតម្រូវការ របស់ប្រជាពលរដ្ឋ នៅក្នុងមូលដ្ឋាន អនុវត្តនៅអភិក្រម អភិក្រម “ឆ្លុះកញ្ចក់ ងូតទឹក ដុសក្អែល ព្យាបាល និងវះកាត់” ។
ប្តេជ្ញាបម្រើសេវាជូនប្រជាពលរដ្ឋឲ្យបានលឿន និងមានតម្លាភាព ពង្រឹងសាមគ្គីភាពផ្ទៃក្នុងឱ្យបានល្អ។ ពង្រឹងការអនុវត្តធ្វើអោយភូមិសង្កាត់ មានសុវត្ថិភាព។ ប្ដេជ្ញាកសាងសមាជិកបក្សទៅតាមផែនការរបស់គណបក្ស និងគៀងគរ សមាជិកគណបក្សឲ្យបានច្រើន ដោយសមាជិកម្នាក់ សន្លឹកឆ្នោតមួយសន្លឹក៕
