បរទេស ៖ ក្រុមមន្ត្រីបាននិយាយថា មន្ត្រីប៉ូលិសពីរនាក់បានស្លាប់ និងម្នាក់ទៀតរងរបួសនៅក្នុងរដ្ឋ Johor របស់ប្រទេសម៉ាឡេស៊ី កាលពីព្រឹកថ្ងៃសុក្រ នៅពេលដែលពួកគេត្រូវបានវាយប្រហារដោយបុរសម្នាក់ដែលត្រូវបានគេសង្ស័យថា ជាសមាជិកនៃក្រុមសកម្មប្រយុទ្ធដែលមានទំនាក់ទំនងនឹងអាល់កៃដា Jemaah Islamiah (JI) ។ JI គឺជាក្រុមសកម្មប្រយុទ្ធដែលស្វែងរកការបង្កើតរដ្ឋអ៊ីស្លាមនៅអាស៊ីអាគ្នេយ៍។
យោងតាមសារព័ត៌មាន VN EXPRESS ចេញផ្សាយកាលពីថ្ងៃទី១៨ ខែឧសភា ឆ្នាំ២០២៤ បានឱ្យដឹងថា អធិការប៉ូលិសម៉ាឡេស៊ី Razarudin Husain បាននិយាយថា ជនសង្ស័យបានចូលក្នុងប៉ុស្តិ៍ប៉ូលីសក្នុងទីក្រុង Ulu Tiram នៃ Johor ភ្លាមៗបន្ទាប់ពីម៉ោង ២ ទៀបភ្លឺ ដោយពាក់ម៉ាស់ និងប្រដាប់ដោយកាំបិត។
ប៉ូលិសម្នាក់បានចូលទៅជិត ជនសង្ស័យ ដែលបានសម្លាប់មន្ត្រីនោះដោយកាំបិត ហើយដកហូតកាំភ្លើងខ្លី។ លោក Razarudin បានប្រាប់សន្និសីទ សារព័ត៌មានតាមទូរទស្សន៍ថា ការបាញ់ប្រហារបានកើតមានឡើងដែលនាំឱ្យមន្ត្រីទីពីរស្លាប់ និងរបួសមន្រ្តីប៉ូលីសទីបី។
លោក Razarudin បាននិយាយបន្តថា ជនសង្ស័យក៏ត្រូវបានសម្លាប់នៅក្នុង ការបាញ់ប្រហារនោះផងដែរ។ លោកបានបន្តថា ជនសង្ស័យជាកូនប្រុសរបស់សមាជិក JI ដែលគេស្គាល់ថា មិនមានប្រវត្តិឧក្រិដ្ឋកម្មពីមុនមកទេ។
ប៉ូលីសបានចាប់ខ្លួនមនុស្ស ៧ នាក់ពាក់ព័ន្ធនឹងការវាយប្រហារនេះ រួមទាំងសមាជិក ៥ នាក់នៃគ្រួសាររបស់អ្នកវាយប្រហារផងដែរ៕
ប្រែសម្រួលៈ ណៃ តុលា
