យន្តហោះគ្មានមនុស្ស បើករបស់អ៊ុយក្រែន វាយប្រហារលើឡានក្រុង ដឹកកម្មករទៅបេះផ្លែស្រ្តប៊ីរី បណ្តាលឱ្យស្លាប់ម្នាក់ និងជាច្រើននាក់របួស

បរទេស ៖ អភិបាលក្រុងរបស់រុស្ស៊ី លោក Vladimir Saldo បាននិយាយ កាលពីថ្ងៃអាទិត្យថា មនុស្សម្នាក់បានស្លាប់ និងជាច្រើននាក់ទៀត បានរងរបួសនៅក្នុងការវាយប្រហារ ដោយយន្តហោះគ្មានមនុស្សបើក របស់អ៊ុយក្រែន លើរថយន្តក្រុងដែលដឹកជនស៊ីវិលនៅក្នុងតំបន់ Kherson នៃប្រទេសរុស្ស៊ី ។

យោងតាមសារព័ត៌មាន RT ចេញផ្សាយនៅថ្ងៃទី១៩ ខែឧសភា ឆ្នាំ២០២៤ បានឱ្យដឹងថា លោក Saldo បានសរសេរនៅលើ Telegram ថា ការវាយប្រហារបានកើតឡើងនៅក្នុងភូមិ Radensk កាលពីព្រឹកថ្ងៃអាទិត្យ ។ លោកបានបន្ថែមថា យន្តហោះគ្មានមនុស្សបើក (UAV) បានកំណត់គោលដៅលើយានជំនិះ ដឹកកម្មករនៅលើផ្លូវ ដែលធ្វើដំណើរ ទៅបេះផ្លែស្ត្របឺរី។

លោកថា “ការផ្ទុះបានសម្លាប់ មនុស្សម្នាក់ មានអ្នករបួសជាច្រើននាក់ ដែលកំពុងទទួលជំនួយផ្នែកវេជ្ជសាស្រ្ដជាចាំបាច់»។ តំបន់រុស្ស៊ីបានឃើញការ វាយប្រហារជាច្រើនលើរថយន្តក្រុង ដោយយន្តហោះគ្មានមនុស្សបើក របស់អ៊ុយក្រែនចាប់តាំងពីដើមខែនេះ។

កាលពីថ្ងៃទី៦ ខែឧសភា មានមនុស្ស ៧ នាក់ បានស្លាប់ និងជាច្រើននាក់បានរងរបួស បន្ទាប់ពី UAVs បានកំណត់គោលដៅលើឡានក្រុងពីរគ្រឿង ដែលដឹកកសិករនៅជិតភូមិ Beryozovka ក្នុងតំបន់ Belgorod ហើយ ពីរថ្ងៃមុននេះ មនុស្សពីរនាក់បានរងរបួសនៅពេល ដែលយន្តហោះគ្មានមនុស្សបើកបានបុកធ្លាក់លើឡានក្រុងនៅក្នុងភូមិ Voznesenka ក្នុងតំបន់ Belgorod ផងដែរ៕