បរទេស៖ អនុប្រធានាធិបតីសហរដ្ឋអាមេរិក និងជាបេក្ខជនប្រធានាធិបតីមកពីគណបក្សប្រជាធិបតេយ្យ លោកស្រី Kamala Harris បាននិយាយកាលពីថ្ងៃព្រហស្បតិ៍ថា ការកាត់បន្ថយការកើនឡើងនៃភាពតានតឹង គឺត្រូវការជាចាំបាច់នៅក្នុងតំបន់មជ្ឈិមបូព៌ា ដែលជាតំបន់មួយនៅគែមអស់ជាច្រើនខែ ចំពេលមានសង្រ្គាមរបស់អ៊ីស្រាអែលនៅហ្គាហ្សា និងលីបង់។
យោងតាមសារព័ត៌មាន រ៉យទ័រ ចេញផ្សាយនៅថ្ងៃទី១១ ខែតុលា ឆ្នាំ២០២៤ បានឱ្យដឹងថា ហេតុអ្វីបានជាវាសំខាន់ នោះគឺបទឈប់បាញ់នៅតែមានភាពស្ទាក់ស្ទើរនៅក្នុងតំបន់ហ្គាហ្សា និងលីបង់ ហើយតំបន់កំពុងរៀបចំសម្រាប់ការឆ្លើយតបរបស់អ៊ីស្រាអែលចំពោះការវាយប្រហារដោយមីស៊ីលអ៊ីរ៉ង់កាលពីសប្តាហ៍មុន ដែលបានធ្វើឡើងនៅក្នុងការសងសឹកចំពោះសកម្មភាពយោធារបស់អ៊ីស្រាអែលនៅក្នុងប្រទេសលីបង់។ គ្មាននរណាម្នាក់នៅអ៊ីស្រាអែលត្រូវបានសម្លាប់ក្នុងការវាយប្រហាររបស់អ៊ីរ៉ង់ឡើយ ហើយក្រុងវ៉ាស៊ីនតោនបានហៅថា ការវាយប្រហារនេះ គ្មានប្រសិទ្ធភាព។
សម្រាប់តំបន់ហ្គាហ្សា លោកប្រធានាធិបតី Joe Biden បានដាក់ចេញនូវផែនការបទឈប់បាញ់ចំនួនបីដំណាក់កាលនៅថ្ងៃទី៣១ ខែឧសភា ដែលបានជួបឧបសគ្គជាច្រើនខែ ជុំវិញការទាមទាររបស់អ៊ីស្រាអែល ក្នុងការរក្សាវត្តមាននៅក្នុងច្រករបៀងមួយនៅព្រំដែនហ្គាហ្សាជាមួយអេហ្ស៊ីប និងជុំវិញភាពខុសគ្នាក្នុងការដោះដូរចំណាប់ខ្មាំងអ៊ីស្រាអែល និងអ្នកទោសប៉ាឡេស្ទីន។ .
ប្រទេសលីបង់ ក្រុងវ៉ាស៊ីនតោន និងទីក្រុងប៉ារីស បានដាក់សំណើបទឈប់បាញ់រយៈពេល ២១ថ្ងៃ នៅចុងខែកញ្ញា ដែលអ៊ីស្រាអែលបានច្រានចោល។
លោកស្រី Harris បានប្រាប់អ្នកយកព័ត៌មាននៅពេលលោកស្រីចាកចេញពីទីក្រុង Las Vegas ថា “យើងត្រូវឈានដល់បទឈប់បាញ់មួយ” ខណៈពេលកំពុងធ្វើអត្ថាធិប្បាយអំពីស្ថានភាពនៅហ្គាហ្សា និងលីបង់ ដោយលោកស្រីថា “យើងត្រូវតែបន្ធូរបន្ថយ។
ការថ្កោលទោសម្តងម្កាលរបស់ក្រុងវ៉ាស៊ីនតោនចំពោះអ៊ីស្រាអែល ជុំវិញចំនួនអ្នកស្លាប់ជនស៊ីវិលក្នុងសង្រ្គាម ភាគច្រើនជាពាក្យសំដី ដោយគ្មានការផ្លាស់ប្តូរសំខាន់ៗនៅក្នុងគោលនយោបាយឡើយ៕
ប្រែសម្រួលៈ ណៃ តុលា
