បន្ទាយមានជ័យ ៖ សម្ដេចធិបតី ហ៊ុន ម៉ាណែត នាយករដ្ឋមន្ដ្រីនៃកម្ពុជា បានថ្លែងឱ្យដឹងថា នាពេលកន្លងទៅ អ្នកនយោបាយជ្រុលនិយម បានបោកប្រជាពលរដ្ឋ នៅភូមិបឹងជង្រុកតេជោឈ្នះ ឈ្នះ ឃុំទួលពង្រ ស្រុកម៉ាឡៃ ឱ្យចូលរួមសកម្មភាពបាតុកម្មប្រឆាំង រាជរដ្ឋាភិបាលស្របច្បាប់ និងដុតសង្គមកម្ពុជា។
នាឱកាសអញ្ជើញជាអធិបតីសម្ពោធសមិទ្ធផលនានា នៅតំបន់អភិវឌ្ឍន៍បឹងជង្រុកតេជោឈ្នះឈ្នះ នៅព្រឹកថ្ងៃទី២៩ ខែវិច្ឆិកា ឆ្នាំ២០២៤ សម្ដេចធិបតី ហ៊ុន ម៉ាណែត បានបញ្ជាក់ថា ជាពិសេសថ្មីៗនេះ អ្នកនយោបាយជ្រុលនិយម ក៏បានបោកបញ្ឆោតឱ្យយុវជននៅកម្ពុជា រស់នៅក្រៅប្រទេស ដូចជា ជប៉ុន កូរ៉េ ធ្វើបាតុកម្ម ផ្ដួលរំលំរាជរដ្ឋាភិបាលស្របច្បាប់។
សម្ដេចធិបតី មានប្រសាសន៍ថា «អ្នកនយោបាយមួយចំនួនហៅ (ហៅពលរដ្ឋភូមិបឹងជង្រុកតេជោឈ្នះ ឈ្នះ) ទៅស្ទឹងមានជ័យ ហើយសន្យានេះ សន្យានោះ។ ប៉ុន្ដែខែមុនគេប្រើក្មេងៗនៅ នៅជប៉ុន ដុតប្រទេស»
នាឱកាសនោះ សម្ដេច នាយករដ្ឋមន្ដ្រី បានលើកឡើងថា តំបន់អភិវឌ្ឍន៍បឹងជង្រុកតេជោឈ្នះឈ្នះ របស់ខេត្តបន្ទាយមានជ័យ គឺជាសមិទ្ធផលនៃនយោបាយឈ្នះ ឈ្នះ ចំនួន២ រួមមាន៖ ១-កែប្រែតំបន់ដែលធ្លាប់តែប្រយុទ្ធគ្នា ក្នុងសង្គ្រាមទៅជាតំបន់អភិវឌ្ឍន៍ និងទី២ គឺការដោះស្រាយបញ្ហាជម្លោះដីធ្លី ៕
